सामाजिक वास्तवतेचे दर्शन घडवणारा वाघर येतोय सिनेरसिकांच्या भेटीला

१२ वर्षांची 'ठकी' नावाची मुलगी आपल्या लहान भावासोबत आनंदी जीवन जगत असताना कोवळ्या वयात 'ठकी'च्या लग्नाची तयारी चालू होते. इच्छा नसतानाही तिच्यावर लग्न करण्याची वेळ येते. कमी वयात लग्नासारख्या अनेक प्रसंगांना तोंड देताना तिच्या आनंदाला जणू काही नजरच लागते.

अशा भावनिक कथा व सामाजिक विषयावर आधारित असलेला ‘राजेंद्र फिल्म प्रोडक्शन’ प्रस्तुत 'वाघर' हा चित्रपट येत्या १४ ऑक्टोबरला प्रदर्शित होत असल्याची माहिती चित्रपटाचे निर्माते राजेंद्र बरकडे व दिग्दर्शक भिमराव पडळकर यांनी पत्रकार परिषदेत दिली. यावेळी सिनेमॅटोग्राफर अमन खान यांची विशेष उपस्थिती होती. दरम्यान 'वाघर' या चित्रपटाचा पोस्टर व ट्रेलर प्रदर्शित करण्यात आला. 

या चित्रपटात समीक्षा सोनवलकर प्रमुख भूमिकेत दिसणार आहे. या चित्रपटाची कथा, संवाद, स्क्रीनप्ले व दिग्दर्शन भिमराव पडळकर यांचे आहे. चित्रपटाचे छायाचित्रण मराठी व हिंदी चित्रपटाचे सिनेमॅटोग्राफर अमन खान यांनी केले असून संगीत रवि वव्हाळे व विकी हांडा यांचे आहे.