म्हसवडकरांच्या पिण्याच्या पाण्याची वणवण थांबण्यासाठी माण नदीत पाणी सोडावे

म्हसवड (ता.माण) नगरपालिकेला ८ दिवसांतून एकचवेळ पिण्याच्या पाण्याचा पुरवठा केला जात असल्यामुळे येथील नागरिकांच्या पिण्याच्या पाण्याची होत असलेली गैरसोय थांबवण्यासाठी उरमोडी, जिहे कटापुर प्रकल्पातील पाणी माण नदीत सोडून बंधारे भरून घेण्याची मागणी माढा लोकसभा मतदारसंघाचे खासदार धैर्यशील मोहिते-पाटील यांनी सातारा जिल्ह्याचे पालकमंत्री शंभूराज देसाई यांच्याकडे पत्राद्वारे केली आहे.

म्हसवड नगरपालिकेला पिण्याच्या पाण्याचा पुरवठा ८ दिवसांतून एकचवेळ केला जात असल्यामुळे येथील नागरिकांची पिण्याच्या पाण्यासाठी वणवण चालू आहे. वाडीवस्त्यांवर टँकरने पाणी पुरवठा केला जात आहे. उरमोडी किंवा जिहे कटापुर प्रकल्पातील पाणी माण नदीमध्ये सोडल्यास बंधारे भरतील, पाण्याची पातळी वाढेल, विहीर आणि बोअरला पाणी आल्यावर पाण्याचा प्रश्न सुटण्यास मदत होईल, असे खासदार मोहिते-पाटील यांनी दिलेल्या पत्रात नमूद केले आहे.

येरळवाडी तलाव भरणे गरजेचा

येरळवाडी (ता.खटाव) येथील येरळवाडी मध्यम प्रकल्पाच्या लाभक्षेत्रात पाऊसमान कमी आहे. भविष्यातील पिण्याच्या पाण्याच्या योजनेसाठी, औद्योगीकरणासाठी, शेती सिंचनासाठी पाण्याची नितांत गरज भासणार असल्यामुळे येरळवाडी प्रकल्पामध्ये उरमोडी, जिहे कटापूर प्रकल्पामधून पाणी सोडून येरळवाडी तलाव भरणे गरजेचे असल्याचे खासदार मोहिते-पाटील यांनी दिलेल्या दुसर्‍या पत्रात नमूद केले आहे.

येरळवाडी मध्यम प्रकल्पाची साठवण क्षमता ३२.८० दलघमी आहे. या प्रकल्पात सध्या ३३% पाणी साठा उपलब्ध आहे. ४५ गावांच्या पाणी पुरवठा योजना, औद्योगीक वसाहतीसाठी लागणारे पाणी, लाभक्षेत्रातील शेती सिंचनासाठी लागणारे पाणी या प्रकल्प आराखड्यामध्ये सामाविष्ठ असल्याचे पालकमंत्री शंभूराज देसाई यांच्या निदर्शनास पत्राद्वारे आणून दिले आहे.