बौद्ध उमेदवारीची खासदार शरद पवार यांच्याकडे मागणी

"एकच निर्धार; बौद्ध आमदार'' असा नारा देत फलटण-कोरेगाव विधानसभा राखीव मतदारसंघातील एकवटलेल्या बौध्द समाजाच्या शिष्टमंडळाने राष्ट्रवादी काँग्रेस शरदचंद्र पवार पक्षाचे अध्यक्ष माजी केंद्रीय मंत्री खासदार शरद पवार यांची बारामतीमधील 'गोविंद बाग' या निवासस्थानी सदिच्छा भेट घेतली. दरम्यान शिष्टमंडळाने बौध्द समाजाला विधानसभेची उमेदवारी देण्याची एका प्रस्तावाव्दारे पवार यांचेकडे मागणी केली.

भेटीदरम्यान, फलटण-कोरेगाव विधानसभा मतदारसंघात किती लोक जातीनिहाय इच्छूक आहेत. आमच्या पक्षाकडे उमेदवारीसाठी किती लोकांनी अर्जाव्दारे मागणी केली आहे, याची सविस्तर माहिती शिष्टमंडळाकडुन घेत विधानसभा मतदारसंघातील राजकीय परिस्थीती जाणुन घेतल्यानंतर खासदार पवार यांनी सकारात्मक भूमिका दर्शवत बौध्द समाजाच्या पाठीशी आपण कायम असल्याचे सांगितले. बौध्द समाजातील काही निवडक नावे माझ्याकडे द्या. त्या नावांचा आमचे लोक विधानसभा मतदारसंघात सर्व्हे करतील आणि गणेशोत्सव झाल्यानंतर आपल्या शिष्टमंडळाबरोबर एकत्र बसुन या बाबतचा निर्णय घेतला जाईल, अशी सकारात्मक ग्वाही खा.शरद पवार यांनी उपस्थित शिष्टमंडळास दिली.

तब्बल अर्धा तास चाललेल्या चर्चेदरम्यान शिष्टमंडळाने "एकच निर्धार; बौध्द आमदार" संकल्पना, गावभेटी, संवाद अभियान, फलटणमधील बौध्द समाजाचा महामेळावा, विविध राजकीय पक्षाकडील उमेदवारीची मागणी यासह अनेक विषयांची माहिती खासदार पवार यांना दिली.

दरम्यान, संविधान समर्थन समितीच्यावतीने ज्येष्ठ पत्रकार प्रा.रमेश आढाव यांच्याहस्ते शरद पवार यांचा यथोचित सत्कार करण्यात आला. यावेळी विजय येवले, राजु मारूडा, सनी काकडे, संग्राम अहिवळे, शक्ती भोसले, नंदकुमार मोरे, संजय गायकवाड, सचिन अहिवळे, सुधीर अहिवळे, दया पडकर, वैभव काकडे, बुवासाहेब हुंबरे, महादेव गायकवाड, रोहित माने, बंटी साबळे, सुरज अहिवळे, तेजस भोसले, सागर अहिवळे, रवी मोरे, विशाल गुंजाळ उपस्थित होते. खासदार शरद पवार यांच्या सकारात्मक भूमिकेच्या पार्श्वभूमीवर बौध्द समाज शिष्टमंडळाने त्यांचे आभार मानले.