गॅलेक्सी संस्थेच्या कार्यक्षेत्र विस्तारास परवानगी

केबी उद्योग समूहातील कर्मचारी, शेतकरी, शेतमजूर, व्यवसायिक यांच्या आर्थिक विकासासाठी युवा उद्योजक सचिन यादव यांच्या पुढाकाराने स्थापन झालेल्या गॅलेक्सी को-ऑपरेटिव्ह क्रेडिट सोसायटी संस्थेला पुणे जिल्ह्यात कार्यक्षेत्र विस्तारास परवानगी मिळाली आहे. या संस्थेने अल्पावधीत पारदर्शक कारभार करून नावलौकिक प्राप्त केला असून आर्थिक निकषांचे तंतोतंत पालन केल्याने संस्थेस २०२३-२४ या आर्थिक वर्षात ऑडीट वर्ग 'अ' प्राप्त केला असल्याची माहिती संस्थेचे संचालक हेमंत खलाटे यांनी प्रसिद्धी पत्रकाद्वारे दिली.

५ वर्षांपूर्वी गॅलेक्सी पतसंस्थेची स्थापना झाली. स्थापनेपासून पारदर्शक व सभासदाभिमुख कारभार करून संस्थेने ग्राहकांचा विश्वास संपादन केला. सहकारातील कायदे व निकषांचे पालन करून ग्राहक, सभासदांना गरजेनुसार कर्ज उपलब्ध करून अल्प व दीर्घकालीन बचतीच्या माध्यमातून आर्थिक समृद्धीसाठी विविध योजना सुरू केल्या असल्याचे पत्रकात नमूद केले आहे.

गॅलेक्सी कुटुंबाचे आधारस्तंभ असलेल्या केबी उद्योग समूहाचे कर्मचारी, शेतकरी, शेतमजूर, छोटे व्यापारी यांच्यात आर्थिक शिस्त निर्माण करण्यात संस्थेचे संस्थापक युवा उद्योजक सचिन यादव संस्थेच्या संचालकांच्या व कर्मचाऱ्यांच्या सहकार्य, योगदानातून यशस्वी झाले आहेत. ग्राहक सभासद हिताची पारदर्शक कारभाराच्या माध्यमातून जोपासना होत असल्याने गॅलेक्सीचा ग्राहकवर्ग दिवसेंदिवस वाढत आहे. जिल्ह्यात गॅलेक्सी पतसंस्थेचा नावलौकिक सर्वदूर पोहोचला आहे. कार्यक्षेत्र वाढवण्यासाठी आवश्यक असलेल्या सर्व निकषांस पात्र असल्याने संस्थला पुणे जिल्ह्यात कार्यक्षेत्र विस्तारासाठी परवानगी मिळाली आहे.

ऑडीट वर्ग 'अ'च्या माध्यमातून सर्वोत्तम आर्थिक संस्था असल्याचे सहकार खात्याकडून मिळालेले प्रमाणपत्र व पुणे जिल्ह्यात कार्यक्षेत्र विस्तार करण्यास मिळालेली परवानगी पाहता भविष्यात गॅलेक्सी को-ऑपरेटिव्ह क्रेडिट सोसायटीचा नावलौकिक निश्चितच राज्यभर पोहोचेल, असा विश्वास संस्था समूह गट व्यक्त करीत आहे.