महाराष्ट्रातील मतमोजणी २१ डिसेंबरलाच ; सर्वोच्च न्यायालयाचा निर्णय

एकता दर्शन (फलटण) : राज्यात विविध ठिकाणी नगरपालिका व नगरपंचायतच्या निवडणुका पार पडलेल्या आहेत, त्यांची मतमोजणी २१ डिसेंबर रोजीच करण्यात यावी, असा निर्णय सर्वोच्च न्यायालयाने दिला आहे. मुंबई उच्च न्यायालयाच्या नागपूर खंडपीठानेही असाच निर्णय काही दिवसांपूर्वी दिलेला होता. या निर्णयाच्या विरोधात सर्वोच्च न्यायालयात याचिका सादर करण्यात आल्या होत्या. त्या फेटाळण्यात आल्या आहेत.

महाराष्ट्रात २ डिसेंबर रोजी अनेक ठिकाणी नगरपालिका आणि नगरपंचायतींच्या निवडणुकांसाठी मतदान पार पडले होते. ३ डिसेंबरला मतमोजणी होणार होती. तथापि, २४ नगरपालिका आणि १५४ प्रभागांमधील मतदान पूढे ढकलण्यात आले होते. ते २० डिसेंबरला होईल, अशी घोषणा महाराष्ट्र निवडणूक आयोगाकडून करण्यात आली होती. त्यामुळे २० डिसेंबरला मतदान झाल्यानंतरच संपूर्ण मतमोजणी करण्यात यावी, अशी " मागणी करणारी याचिका मुबई उच्च न्यायालयाच्या नागपूर खंडपीठात सादर करण्यात आली होती. ही मागणी मान्य करुन पीठाने २० डिसेंबरला निवडणूक प्रक्रिया पूर्ण झाल्यानंतरच २१ डिसेंबरला मतमोजणी करण्यात यावी, असा निर्णय दिला होता. या निर्णयाला सर्वोच्च न्यायालयात आव्हान देण्यात आले होते.