संत नामदेव महाराज रथयात्रा व सायकल वारी उत्साहात

भागवत धर्म प्रसारक मंडळ, पालखी सोहळा पत्रकार संघ, श्री नामदेव दरबार कमिटी व समस्त नामदेव शिंपी समाजाच्या वतीने संत नामदेव महाराज यांची ७५५ वी जयंती, कैवल्य साम्राज्य चक्रवर्ती श्री ज्ञानेश्वर महाराज यांचा ७२९ वा संजीवन समाधी सोहळा व शीख धर्माचे संस्थापक गुरुनानक देव यांच्या ५५६ व्या प्रकाश पर्वानिमित्त प्रतिवर्षीप्रमाणे रविवार दिनांक २ नोव्हेंबर ते ३ डिसेंबर २०२५ दरम्यान ३१ दिवसांची भव्य रथयात्रा व सायकल वारी आयोजित करण्यात आली होती. 

वारीचे हे चौथे वर्ष असून महाराष्ट्र, गुजरात, राजस्थान, हरियाणा, पंजाब, दिल्ली, उत्तर प्रदेश व मध्यप्रदेश या आठ राज्यातून रथयात्रा व सायकल वारीने प्रवास केला. जवळपास १०० सायकलस्वार व ५० भजनी मंडळे यात सहभागी झाली होती. देशातील या पहिल्या अध्यात्मिक सायकल वारीचे नेतृत्व भागवत धर्म प्रसारक मंडळाचे अध्यक्ष सूर्यकांत भिसे यांनी केले.

विविध राज्यातून प्रवास करत असलेल्या सायकल वारीची सांगता श्री क्षेत्र घुमाण येथे झाली. रथयात्रेची सांगता श्री क्षेत्र पंढरपूर येथील संत नामदेव महाराज यांचे जन्मस्थान असलेल्या नामदेव वाड्यात झाली. संत नामदेव महाराज यांचे १६ वे वंशज माऊली महाराज नामदास यांच्या हस्ते पादुकांची विधीवत पूजा व आरती करण्यात आली. यावेळी संत नामदेव महाराज यांचे १६ वे वंशज मुकुंद महाराज नामदास, मुरारी महाराज नामदास, पालखी सोहळा पत्रकार संघाचे अध्यक्ष शंकर टेमघरे, उपाध्यक्ष सुभाष भांबुरे, सचिव ॲड.विलास काटे, सहसचिव राजेंद्र कृष्ण कापसे, खजिनदार मनोज मांढरे, विश्वस्त राजेंद्र मारणे, महाराष्ट्र राज्य समन्वयक गणेश उंडाळे आदी मान्यवर उपस्थित होते .