कंगना राणावतच्या 'इमर्जन्सी'चा टीझर प्रेक्षकांच्या भेटीला

एकता दर्शन : अभिनेत्री कंगना राणावतचा बहुप्रतीक्षेत असलेला 'इमर्जन्सी' २४ नोव्हेंबरला प्रदर्शित होणार असल्याची घोषणा स्वतः कंगनाने चित्रपटाचा टीझर शेअर करत केली. यापूर्वी चित्रपटाच्या प्रदर्शनाची तारीख ऑक्टोबर महिन्यातली होती, मात्र आता 'इमर्जन्सी' नोव्हेंबरमध्ये प्रदर्शित होणार आहे.

'इमर्जन्सी' चित्रपटात कंगना माजी पंतप्रधान इंदिरा गांधी यांच्या भूमिकेत दिसणार आहे. १ मिनिटाचा टीझर शेअर करताना कंगनाने लिहिले आहे, संरक्षक की हुकूमशहा? आपल्या देशाच्या नेत्याने आपल्या लोकांविरुद्ध युद्ध घोषित केले तेव्हा आपल्या इतिहासातील सर्वात गडद टप्प्याचे साक्षीदार व्हा.

'इमर्जन्सी' हा या वर्षातील बहुप्रतीक्षेत असलेल्या चित्रपटांपैकी एक असून तो हिंदीत प्रदर्शित होणार आहे. या चित्रपटाचे दिग्दर्शन कंगना राणावतने केले आहे व पटकथा रितेश शाह यांची आहे.

चित्रपटाच्या टीझरची सुरुवात २५ जून १९७५ या तारखेपासून होते, ज्या दिवशी देशात आणीबाणी लागू करण्यात आली होती. यानंतर वृत्तपत्राची एक हेडलाईन येते ती अशी आहे की, देशात आणीबाणी लागू करण्यात आली आहे. त्यानंतर अनुपम खेर यांची एक झलक दाखवली आहे, ज्यामध्ये ते तुरुंगाच्या मागे दिसत आहेत. लोकं रस्त्यावर उतरली आहेत, पोलीस गोळ्या झाडत आहेत. मग इंदिरा गांधींचा आवाज येतो. इंदिरा इज इंडिया, इंडिया इज इंदिरा. त्यानंतर २४ नोव्हेंबरला हा चित्रपट चित्रपटगृहांमध्ये प्रदर्शित होत असल्याचे शेवटी लिहिले आहे.

इमर्जन्सी' हा चित्रपट भारताच्या माजी इंदिराजी गांधी यांच्या प्रवासाचा मागोवा घेणारा आहे. १९७५ मध्ये घडलेल्या घटनांना त्यांनी कसे तोंड दिले, ज्याने भारताचा इतिहास बदलला, हे या चित्रपटात दाखवण्यात येणार आहे.