विधानसभा उमेदवारीसाठी बौद्ध समाज एकवटला

फलटण-कोरेगाव विधानसभा मतदारसंघ अनुसूचित जातीसाठी राखीव आहे. संसदीय लोकशाहीतील राजकीय प्रतिनिधित्वाची संधी या प्रवर्गातील सर्व जातींना मिळणे अपेक्षित आहे. परंतु मागील ३ पंचवार्षिक म्हणजेच १५ वर्षांपासून येथील प्रमुख राजकीय पक्षांनी बौद्ध समाजाचा उमेदवार विधानसभा निवडणुकीसाठी दिला नसल्याने तालुक्यातील संपूर्ण बौद्ध समाज एकवटला आहे.

फलटण-कोरेगाव विधानसभा मतदारसंघात अनुसूचित जातींमध्ये सर्वाधिक संख्येने असणार्‍या बौद्ध समाजाचा राजकीयदृष्ट्या विचार येथील पक्षांनी केला नसल्याच्या व आगामी विधानसभा निवडणुकीच्या पार्श्वभूमीवर येथील डॉ.बाबासाहेब आंबेडकर भवनमध्ये बैठक संपन्न झाली.

या बैठकीमध्ये फलटण-कोरेगाव विधानसभा निवडणुकीत बौद्ध समाजाला उमेदवारी देण्यात यावी, बौद्ध समाजाचा आमदार निवडून आणणे, उमेदवारीसाठी राजकीय पक्षांना प्रस्ताव देणे, विधानसभा निवडणुकीसंदर्भात समाजाची भूमिका व दिशा जाहीर करण्यासाठी मेळावा घेणे, संवाद अभियान दौरा करणे आदी विषयांवर सामुदायिक चर्चा झाली. दरम्यान, अनेकांनी आपले विचार व्यक्त केले.

या बैठकीसाठी ज्येष्ठ पत्रकार प्रा.रमेश आढाव, मधुकर काकडे, विजय येवले, दत्ता अहिवळे, सनी अहिवळे, सुधीर अहिवळे, सचिन अहिवळे, सनी काकडे, ॲड.शाम अहिवळे, विकास काकडे, ॲड.रोहित अहिवळे, नंदू मोरे, रोहित माने, सागर सोरटे, शक्ती भोसले, विकी काकडे, बाळू अहिवळे, हरीश उर्फ आप्पा काकडे, राजू काकडे, संजय निकाळजे, दया पडकर, सनी मोरे, शितल अहिवळे, कपील काकडे, संग्राम अहिवळे, कुणाल काकडे, मोहन ढावरे, सिद्धार्थ प्रबुद्ध, सचिन मोरे, हणमंत लोंढे, ॲड.मनोज जावळे, बापूराव जगताप यांच्यासह तालुक्याच्या ग्रामीण भागातून असंख्य बांधव उपस्थित होते.

​समाजाचे काम करू : स्थानिक लोकप्रतिनिधी

शासकीय विश्रामगृहात झालेल्या बैठकीत विविध पक्षाचे आंबेडकरी चळवळीतील स्थानिक लोकप्रतिनिधी नगरसेवक सनी अहिवळे, सचिन अहिवळे, सुधीर अहिवळे, यांच्यासह रिपब्लिकन पक्षाचे विजय येवले, वंचित बहुजन आघाडीचे उमेश कांबळे यांनी त्यांची भूमिका स्पष्ट करताना समाजाच्या उमेदवाराचे काम करण्याचा निर्णय घेतला.

 संवाद अभियान दौर्‍याला सुरवात 

दोन बैठकीनंतर दि.15 जुलै पासून तालुक्याच्या ग्रामीण भागात समाजातील प्रमुख घटकांची बौद्ध समाजातील घटकांशी संवाद करण्याची प्रक्रिया संवाद अभियानाद्वारे सुरू झाली असून नियोजनबद्ध रणनितीद्वारे संपूर्ण तालुक्यात संपर्क केला जाणार आहे.