पर्यावरण संवर्धनासाठी 'एक कुटुंब-एक झाड' मोहीम

एकता दर्शन, सातारा : पर्यावरण संवर्धनामध्ये पुरवठा विभागाचा महत्वपूर्ण सहभाग असावा या उद्देशाने सन २०२३ मध्ये पुणे विभागातील पुरवठा विभागामार्फत धान्याचा लाभ घेणाऱ्या प्रत्येक ग्रामीण कुटुंबासाठी 'एक कुटुंब एक झाड' मोहीम राबविण्यात येणार असल्याची माहिती सातारा जिल्हा पुरवठा माहिती अधिकारी वैशाली राजमाने यांनी दिली.

वैशाली राजमाने म्हणाल्या, तालुक्यातील शासकीय धान्याचा लाभ घेणाऱ्या पात्र कुटुंबाची संख्या विचारात घेतली जाणार असून पात्र कुटुंबांसाठी देशी प्रजातीच्या झाडांची रोपे स्थानिक पातळीवर विनामूल्य उपलब्ध होणार आहेत. यामध्ये चिंच, जांभूळ, लिंब, उंबर, वड, पिंपळ, बांबू, कोरफड, तुळस, गावती चहा आदी रोपांचा समावेश आहे. उपलब्ध होणारी रोपे रास्त भाव दुकानदारांमार्फत ग्रामीण भागातील कुटुंबाला मोफत देणे, १५ ऑगस्ट २०२३ रोजी रोपांची सुनिश्चित ठिकाणी लागवड करणे, रोपांच्या देखभालीची जबाबदारी संबंधित कुटुंबावर देणे यासाठी योग्य नियोजन करण्यात येणार आहे.

पुणे विभागातील सर्व रास्त भाव दुकाने, गोदामे, पुरवठा विभागाची कार्यालये यांना आयएसओ मानांकन देऊन गौरविण्यात आले आहे, यासाठी सातारा जिल्ह्यातील सर्व रास्त भाव दुकानदार, पुरवठा विभागातील सर्व अधिकारी व कर्मचारी यांचे महत्वपूर्ण योगदान आहे. केंद्र व राज्यातील सरकारने या नाविन्यपूर्ण योजनेची दखल घेऊन सदर योजना संपूर्ण देशभर राबविण्याचा निर्णय घेतला असल्याचे राजमाने यांनी सांगितले.