ऐतिहासिक सत्तांतरानंतर मंत्री जयकुमार गोरे यांच्याकडून नगराध्यक्ष समशेरसिंह यांचे अभिनंदन

याप्रसंगी माजी खासदार रणजितसिंह नाईक निंबाळकर, आमदार सचिन पाटील, अ‍ॅड.सौ.जिजामाला नाईक निंबाळकर, सौ.मनीषाताई नाईक निंबाळकर, धनंजय साळुंखे पाटील, जयकुमार शिंदे, विश्वासराव भोसले यांच्यासह नवनिर्वाचित नगरसेवक, भाजप-राष्ट्रवादीचे पदाधिकारी व कार्यकर्ते मोठ्या संख्येने उपस्थित होते.

भेटीदरम्यान मंत्री गोरे म्हणाले, भारतीय जनता पक्षाच्या विकासाभिमुख राजकारणावर विश्वास ठेवत फलटणकरांनी १८ विरुद्ध ९ अशा स्पष्ट बहुमताने नगरपालिकेची सत्ता युतीच्या हाती दिली आहे. राज्याचे मुख्यमंत्री देवेंद्र फडणवीस यांनी फलटणमधील प्रचार सभेत 'नगरपालिकेची सत्ता भाजप-राष्ट्रवादी युतीच्या हातात द्या, विकासाची जबाबदारी माझ्यावर सोडा", असे आवाहन केले होते. या आवाहनाला फलटणकरांनी प्रतिसाद दिला आहे. जनतेला टीका-टिप्पणी बदनामीचे राजकारण नको असून केवळ विकास पाहिजे असल्याचे निकालातून स्पष्ट झाले आहे, त्यामुळे दिलेल्या वचनाप्रमाणे फलटणच्या सर्वांगीण विकासासाठी आपण वकिलाची भूमिका निभावणार असल्याची ग्वाही मंत्री गोरे यांनी यावेळी दिली.