जॉन अब्राहम आणि मानुषी छिल्लर या कारणासाठी एकत्र येणार

एकता दर्शन : माजी मिस वर्ल्ड मानुषी छिल्लरने ३ जूनला प्रदर्शित झालेल्या 'सम्राट पृथ्वीराज' चित्रपटामधून अभिनेता अक्षय कुमारसोबत बॉलिवूडमध्ये पदार्पण केले होते. त्यानंतर पुन्हा एकदा २५ वर्षांची मानुषी जॉन अब्राहमसोबत असणाऱ्या पुढच्या चित्रपटासाठी तयार आहे.

अरुण गोपालन दिग्दर्शित आणि दिनेश विजन यांच्या मॅडॉक फिल्म्सने निर्मिती केलेल्या 'तेहरान' नावाच्या अ‍ॅक्शन व थ्रिलर चित्रपटामध्ये जॉन अब्राहम सोबत मानुषी तेहरानमध्ये मुख्य भूमिकेत दिसणार आहे. आजच (१९ जुलै) चित्रपटाच्या निर्मात्यांनी व अभिनेता जॉनने सामाजिक माध्यमावर छायाचित्रे पोस्ट करून मानुषीचे स्वागत केले आहे. या छायाचित्रांमध्ये मानुषी शॉर्ट हेअरस्टाइल व हातात पिस्तूल घेऊन ॲक्शनसाठी उभी असल्याचे दिसत असून तिच्या बाजूला जॉनसुद्धा हातात पिस्तूल घेऊन वाढलेल्या दाढीत उभा आहे. 

मानुषीचा 'सम्राट पृथ्वीराज' हा चित्रपट फारसा चालला नसला तरी, तिच्याकडे चित्रपटांच्या ऑफर येतच आहेत. 'तेहरान'नंतर मानुषी विकी कौशल सोबत दिसणार असून यशराज फिल्म्स त्या चित्रपटाची निर्मिती करणार असल्याची माहिती मिळत आहे. यशराज फिल्म्स हि सर्वात मोठी चित्रपट निर्मिती आणि वितरण कंपन्यांपैकी एक असलेली कंपनी असल्याचे बोलले जाते. त्यामुळे मानुषी यशराज फिल्म्सच्या चित्रपटात कोणत्या भूमिकेत दिसणार याची उत्सुकता तिच्या चाहत्यांना आहे. दुसरीकडे पिळदार शरीरयष्टी असलेल्या जॉन अब्राहमचा 'एक व्हिलन'सुद्धा प्रदर्शित होण्याच्या मार्गावर आहे.