मुख्यमंत्र्यांच्या यंत्रणेवर विश्वास नसेल तर रामराजेंनीच माझी चौकशी करावी : डॉ. मुंडे आत्महत्या प्रकरणी रणजितसिंहांचे थेट आव्हान 

आमदार रामराजे यांनी केलेल्या आरोपांना उत्तर देण्यासाठी माजी खासदार रणजितसिंह नाईक निंबाळकर यांनी पत्रकार परिषद आयोजित केली होती, यावेळी ते बोलत होते.

रामराजेंनी 'पाया पडल्याच्या' केलेल्या आरोपावर रणजितसिंह म्हणाले, मी खासदारकीच्यावेळी कधीही त्यांच्या पाया पडलेलो नाही. उलट, दोन महिन्यांपूर्वी रामराजे स्वतःच आमच्याकडे मनोमिलनासाठी मागे लागले होते. आता निवडणूक समोर पाहून ते सोयीस्करपणे दहशतीचा मुद्दा काढत आहेत. प्रत्यक्षात त्यांनीच नगरपालिकेच्या निवडणुकीत गुंडांना तिकिटं दिली आहेत.

भ्रष्टाचाराच्या आरोपावर उत्तर देताना रणजितसिंह रामराजेंवर गंभीर आरोप करत म्हणाले, लवासा प्रकल्प आणि आशीर्वाद सोसायटी प्रकरणात रामराजेंनी शासनाची फसवणूक केल्याचे सर्व पुरावे कागदपत्रांसह आमच्याकडे आहेत, तरीही आम्ही त्यांना अडकवण्याचा प्रयत्न केला नाही. त्यांना भ्रष्टाचारावर बोलण्याचा कोणताही नैतिक अधिकार नाही. उतार वयात त्यांना तुरुंगात बसवायची आमची इच्छा नाही, मात्र जनतेसमोर त्यांचे खरे रूप येणे गरजेचे असल्याचे रणजितसिंह यांनी यावेळी स्पष्ट केले.

नगराध्यक्ष पदासाठी उभे असलेल्या अनिकेतराजे नाईक निंबाळकर यांची स्वतःची कर्तबगारीशून्य आहे. रेटून खोटं बोलून रामराजेंना आपल्या मुलाला नगराध्यक्ष करायचे आहे. परंतु यावेळी अनिकेतराजेंचे डिपॉझिट जप्त होईल आणि समशेर दादा मोठ्या मताधिक्याने विजयी होतील असा आम्हाला विश्वास असल्याचे रणजितसिंह यांनी यावेळी सांगितले.

धोम-बलकवडीच्या पाण्याशी रामराजेंचा कोणताही संबंध नाही. तसेच, त्यांनी कधीही इतर कारखान्यांना मदत केली नाही. आम्ही कधीही 'कमिन्स' बंद पाडण्याचा प्रयत्न केला नाही. उलट, नाईकबोमवाडी एमआयडीसी होऊ नये, यासाठी रामराजेंनीच प्रयत्न केले होते. आमच्या कारखान्याने तालुक्यात उच्चांकी दर दिला आहे, म्हणूनच शेतकरी आमच्यावर विश्वास ठेवत आहेत. रामराजेंनी आता आपली पुढची पावले जपून टाकावीत, कारण फलटणची जनता त्यांच्या भूलथापांना आता बळी पडणार नसल्याचे रणजितसिंह यांनी यावेळी सांगितले.