फलटण सुरक्षित ठेवण्यासाठी निर्भयपणे मतदान करा : श्रीमंत रामराजे यांचे आवाहन 

फलटण येथील लक्ष्मी विलास या निवासस्थानी आयोजित पत्रकार परिषदेत ते बोलत होते. यावेळी माजी आमदार दीपक चव्हाण, श्रीमंत रघुनाथराजे नाईक निंबाळकर, श्रीमंत सुभद्राराजे नाईक निंबाळकर उपस्थित होते.

आमदार झाल्यावर मी धरण आणि पाण्यासाठी जीवाचे रान केले आहे. नीरा-देवघरचे काम एकाग्रतेने पूर्ण केले आहे. पाटण तालुक्यातील पाणी शोधून आणले आहे. आजच्या तरुण पिढीला पाणी आणण्यासाठी केलेले प्रयत्न कदाचित माहित नसतील, पण त्यांनी हे समजून घेवून मतदान करण्याचे आवाहन रामराजे यांनी यावेळी केले.

मला १५ वर्षे मंत्रिपद आणि ७ वर्षे सभापतिपद मिळाले, परंतू मी नेहमी पवार साहेबांकडे पदाऐवजी फलटणच्या पाण्याची मागणी केली. आज जे लोक मत मागायला येत आहेत, त्या विरोधकांनी दहशत करण्याव्यतिरिक्त काहीही केले नाही. त्यांनी श्रीराम कारखाना आणि कमिन्स सारखे प्रकल्प बंद पाडण्याचा प्रयत्न केला असल्याचे सांगत फलटणला आम्ही गुंडगिरीतून बाहेर काढले असून येथील नागरिकांचे भविष्य सुरक्षित राहण्यासाठी जनतेने कोणत्याही दबावाला बळी न पडता आम्हाला मतदान करावे, असे आवाहन श्रीमंत रामराजे यांनी यावेळी केले.