कृषी पर्यटनामुळे शेतकऱ्यांच्या आर्थिक उत्पन्नात वाढ : गणेश चप्पलवार

शेतीपूरक व्यवसायामध्ये कृषी पर्यटन हा सर्वात महत्वाचा व्यवसाय असून कृषी पर्यटनाच्या माध्यमातून शेतकऱ्यांच्या आर्थिक उत्पन्नात मोठ्या प्रमाणात भर पडत असल्याचे मत ॲग्रो टुरिझम विश्वचे संस्थापक आणि मुख्य कार्यकारी अधिकारी गणेश चप्पलवार यांनी व्यक्त केले. ते धुंडा महाराज देगलूरकर महाविद्यालयातील राष्ट्रीय सेवा योजना अंतर्गत आयोजित विशेष युवक शिबिरात बोलत होते.

देगलूर (नांदेड) : शेतीपूरक व्यवसायामध्ये कृषी पर्यटन हा सर्वात महत्वाचा व्यवसाय असून कृषी पर्यटनाच्या माध्यमातून शेतकऱ्यांच्या आर्थिक उत्पन्नात मोठ्या प्रमाणात भर पडत असल्याचे मत ॲग्रो टुरिझम विश्वचे संस्थापक आणि मुख्य कार्यकारी अधिकारी गणेश चप्पलवार यांनी व्यक्त केले. ते धुंडा महाराज देगलूरकर महाविद्यालयातील राष्ट्रीय सेवा योजना अंतर्गत आयोजित विशेष युवक शिबिरात बोलत होते. यावेळी धुंडा महाराज देगलूरकर महाविद्यालयाचे प्राध्यापक भास्कर कोशिडगेवार, काठेवाडी गावाचे सरपंच सूर्यकांत पोतुलवार, राष्ट्रीय सेवा योजनेचे समन्वयक प्रा. सतीश जांभाळीकर, महाविद्यालयाचे विद्यार्थी आदी मान्यवर उपस्थित होते.

गणेश चप्पलवार म्हणाले, राज्यातील अनेक शेतकऱ्यांनी कृषी पर्यटनाची कास धरली आहे. अनेक तरुण शेतकरी यशस्वीपणे कृषी व ग्रामीण पर्यटन चालवत असून कृषी पर्यटनाच्या माध्यमातून ते आपल्या शेत मालाची विक्री करत आहेत. त्यामुळे कृषी पर्यटन क्षेत्रात येणाऱ्या प्रत्येकाचे भविष्य उज्ज्वल आहे. कृषी पर्यटनामुळे पर्यटन विकास व पर्यावरण रक्षण होण्यास मदत होत आहे. शेतकऱ्यांसह शहरातील नागरिकांना कृषी पर्यटनाची गरज असल्याने  शेतकऱ्याने आपली शेती जपण्यासाठी त्यामध्ये नवीन प्रयोग करून कृषी पर्यटनाकडे वळावे असे आवाहन करत विविध संस्थांच्या आयोजित शिबिरात विद्यार्थ्यांनी सहभाग घेऊन नव-नवीन व्यवसायाची माहिती घ्यावी असे गणेश चप्पलवार यांनी सांगितले.

प्रारंभी ॲग्रो टुरिझम विश्वचे संस्थापक आणि मुख्य कार्यकारी अधिकारी गणेश चप्पलवार यांचा महाविद्यालयातर्फे प्रा. भास्कर कोशिडगेवार यांनी सत्कार केला. कार्यक्रमाचे सूत्रसंचालन व आभार प्रा. सतीश जांभाळीकर यांनी मानले.