कालवा अस्तरीकरणास शेतकऱ्यांचा विरोध

एकता दर्शन : नीरा उजवा कालवा अस्तरीकरणाला शेतकरी, ग्रामस्थांचा असलेला विरोध दिवसेंदिवस वाढत असून मंगळवार दि.१८ रोजी फलटण तालुक्यातील २२ गावांमधील शेतकरी व नागरिकांनी येथील जलसंपदा कार्यालयावर हजारोंच्या संख्येने ट्रॅक्टर मधून मोर्चा काढला. यावेळी महिला, युवक, ग्रामस्थ मोठ्या संख्येने मोर्चात सहभागी झाले होते.

फलटण तालुक्यात तडवळे बंगला ते रावडी दरम्यान ४ किलोमीटर अंतर असलेल्या कालव्यातील अस्तरीकरणाचे काम काही दिवसांपासून सुरू आहे. हे काम सिमेंट काँक्रीट मध्ये करण्यात येत असल्यामुळे कालव्यालगत असणाऱ्या विहिरी, कुपनलिका, बोअरवेल बंद पडण्याच्या भीतीमुळे या अस्तरीकरणाच्या कामाला तालुक्यातील काही गावातील ग्रामपंचायतींनी ग्रामसभेमध्ये ठराव करून विरोध केला आहे. यामध्ये तडवळे, सुरवडी, मुरूम, रावडी बुद्रुक, रावडी खुर्द, खामगाव, होळ, डोंबाळवाडी, कुसुर, पाडेगाव, खराडेवाडी, निंभोरे, वडजल, भिलकटी, चौधरवाडी, साखरवाडी, सासवड, वाडेगाव, निंभोरे, तरडगाव, काळज, घाडगेमळा आदी गावांचा समावेश आहे.

मोर्चातील सहभागी गावातील हजारो शेतकरी, महिला व युवकांनी १०० पेक्षा जास्त ट्रॅक्टरमध्ये बसून मोर्चाला सुरुवात केली. यावेळी फलटण लोणंद-पालखी मार्गावर ४ किलोमीटर पर्यंत लांब रांग लागली होती. मोर्चा दुपारी १२ वाजण्याच्या सुमारास क्रांतिसिंह नाना पाटील चौकात आला यावेळी क्रांतिसिंह नाना पाटील यांच्या पुतळ्याला पुष्पहार घालून 'पायी मोर्चाला' सुरुवात झाली. पुढे छत्रपती शिवाजी महाराज, डॉ.बाबासाहेब आंबेडकर, क्रांतीसुर्य महात्मा फुले या महापुरुषांच्या पुतळ्यांना पुष्पहार घालून मोर्चा प्रांत कार्यालयाच्या समोर आला. यावेळी मोर्चातील सहभागी महिला, शेतकरी, युवकांनी 'अस्तरीकरण हटाव शेतकरी बचाव', 'जल है तो कल है', 'शेतकरी एकजुटीचा विजय असो' अशा घोषणांनी परिसर दणाणून सोडला. मोर्चातील सहभागी महिलांनी फलटणचे उपविभागीय अधिकारी सचिन ढोले व पाटबंधारे विभागाचे मिलिंद सपकाळ यांच्याकडे निवेदन देत कोणत्याही परिस्थितीत कालव्याच्या अस्तरीकरणाचे काम करू नये अन्यथा यापेक्षा अधिक तीव्र आंदोलन करू असा इशारा दिला.

मोर्चात फलटण तालुक्यातील विविध संघटनांचे पदाधिकारी, महिला, युवक, शेतकरी, ग्रामस्थ मोठ्या संख्येने उपस्थित होते.