फलटण तालुक्यातील शेतकऱ्यांनी पिक विम्याचा लाभ घ्यावा

एकदा दर्शन : फलटण तालुक्यातील शेतकऱ्यांनी खरीप हंगामातील बाजरी, कांदा व अन्य पिकांचा पिक विमा केवळ एक रुपयात उतरवावा. दि.३१ जुलैपर्यंत शेतकऱ्यांनी विहित नमुन्यातील अर्ज भरून पिक विमा योजनेचा लाभ घ्यावा असे आवाहन कृषी पर्यवेक्षक दत्तात्रय एकळ यांनी केले आहे.

जावली (ता.फलटण) येथे महाराष्ट्र शासन कृषी विभाग अंतर्गत उपविभागीय कृषी अधिकारी व तालुका कृषी अधिकारी यांच्या मार्गदर्शनाखाली पिक विमा योजना जनजागृती मेळाव्याचे आयोजन करण्यात आले होते, याप्रसंगी कृषी पर्यवेक्षक एकळ बोलत होते. यावेळी कृषी सहाय्यक सतीश हिप्परकर, जावलीचे सरपंच, उपसरपंच, ग्रामपंचायत सदस्य, सोसायटीचे चेअरमन उपस्थित होते.

हवामान आधारित पिक विमा योजनेत शेतकऱ्यांनी मोठ्या संख्येने सहभागी व्हावे. यावर्षी पाऊस कमी पडल्यामुळे बाजरी, कांदा या पिकांची लागवड कमी प्रमाणात झाली आहे. काही शेती क्षेत्र नापेर राहिले आहे. शासनाच्या हवामान आधारित पिक विमा योजनेअंतर्गत यावर्षी पेरणी झालेल्या व नापेर क्षेत्राचाही विमा स्वयं घोषणापत्र भरून बँकेत अथवा सीएसएस केंद्रावर एक रुपया भरून ३१ जुलै पर्यंत विमा उतरवला पाहिजे, असे एकळ यांनी यावेळी सांगितले.

कृषी सहाय्यक सतीश हिप्परकर म्हणाले, विमा उतरवण्यासाठी सातबारा उतारा, खाते उतारा, आधार कार्ड, बँक पासबुक, विहित नमुन्यातील अर्ज आदी कागदपत्रे महत्त्वाची असून शेतकऱ्यांनी विमा फॉर्म व्यवस्थित भरला पाहिजे.

दरम्यान, स्वयंघोषणा पत्राच्या २०० प्रती शेतकऱ्यांना वाटप करण्यात आल्या. शेतकरी जनजागृती मेळाव्यासाठी जावली व परिसरातील शेतकरी वर्ग मोठ्या संख्येने उपस्थित होता.