फलटणमध्ये राष्ट्रीय खो-खो स्पर्धेची जय्यत तयारी

फलटण (एकता दर्शन) : दिनांक २८ ऑक्टोबर ते २ नोव्हेंबर दरम्यान फलटण येथे ३२ वी राष्ट्रीय किशोर / किशोरी खो-खो स्पर्धा होणार असल्याच्या पार्श्वभूमीवर फलटण मधील विविध संस्थांच्या सहभागातून या स्पर्धेचे योग्य नियोजन करण्यात आले असून काही दिवसांवर येऊन ठेपलेल्या स्पर्धेची जय्यत तयारी करण्यात येत आहे. राष्ट्रीय खो-खो स्पर्धेची संधी फलटणला दुसऱ्यांदा मिळाल्याने या स्पर्धा न भूतो न भविष्यती होणार असल्याचे मत महाराष्ट्र खो-खो असोसिएशनचे अध्यक्ष श्रीमंत संजीवराजे नाईक निंबाळकर यांनी पत्रकार परिषदेत व्यक्त केले.

फलटण मध्ये ३२ वी राष्ट्रीय किशोर / किशोरी खो-खो स्पर्धा होत असल्याने या स्पर्धेची माहिती देण्यासाठी येथील मुधोजी हायस्कुलमध्ये पत्रकार परिषद आयोजित करण्यात आली होती. याप्रसंगी श्रीमंत संजीवराजे बोलत होते. यावेळी सातारा जिल्हा खो-खो असोसिएशनचे उपाध्यक्ष कृष्णाथ उर्फ दादा चोरमले यांच्यासह जिल्हा खो-खो स्पर्धा समितीचे विविध पदाधिकारी उपस्थित होते. 

३२ व्या राष्ट्रीय किशोर/किशोरी खो-खो स्पर्धेमध्ये ३० राज्यांतील ६० संघ सहभागी होणार आहेत. यामध्ये ३० किशोर (मुलांच्या) व ३० किशोरी (मुलींच्या) संघांचा समावेश असल्याचे सांगत राष्ट्रीय खो-खो स्पर्धेचे नियोजन युद्ध पातळीवर करण्यात येत असल्याचे श्रीमंत संजीवराजे यांनी सांगितले.

सहभागी होणाऱ्या प्रत्येक संघामध्ये १५ खेळाडू व संघाचे प्रशिक्षक, ५०० किशोर व ५०० किशोरी स्पर्धक, ६० प्रशिक्षक व ४० पंच आदींचा समावेश या स्पर्धेत राहणार असून खेळाडूंसह क्रीडा अधिकारी व पदाधिकारी यांच्यासाठी निवास व भोजन व्यवस्थेचे नियोजन करण्यात आले असल्याचे श्रीमंत संजीवराजे यांनी यावेळी सांगितले.

या स्पर्धा स्व. श्रीमंत शिवाजीराजे नाईक निंबाळकर क्रीडा संकुल येथे होणार असल्याने या क्रीडांगणावर प्रेक्षकांसाठी भव्य प्रेक्षक गॅलरी उभारण्यात येणार आहे. स्पर्धा यशस्वीतेसाठी सर्वच यंत्रणा कार्यरत असून या स्पर्धेचा लाभ खो-खो प्रेमींनी घ्यावा असे आवाहन श्रीमंत संजीवराजे यांनी केले आहे.