गुजरात विरुद्ध चेन्नई ; दोन्ही संघ विजेतेपदासाठी लढणार

एकता दर्शन: जगातील सर्वात मोठी समजली जाणारी क्रिकेट लीग म्हणजेच इंडियन प्रीमियर लीग जवळपास ५८ दिवसांपासून सुरू असून आज या हंगामातील अंतिम सामना अहमदाबादच्या नरेंद्र मोदी स्टेडियमवर गतविजेता गुजरात टायटन्स आणि चारवेळा विजेता असणाऱ्या चेन्नई सुपर किंग्ज यांच्यात होणार आहे.

या हंगामातील ३१ मार्च रोजी खेळला गेलेला पहिला सामनाही गुजरात टायटन्स विरुद्ध चेन्नई सुपर किंग्ज या दोन संघांमध्येच झाला होता. आज आयपीएल मधील अंतिम सामनाही या दोन संघांमध्येच होणार आहे.

गुजरात टायटन्सने या हंगामात एकूण १४ सामन्यांमध्ये १० विजय नोंदवत २० गुणांसह प्रथम क्रमांकाचे स्थान मिळवले. दुसरीकडे, चेन्नईने एकूण १४ पैकी ८ सामने जिंकले. ५ सामन्यात पराभवाला सामोरे जावे लागले. एक सामना पावसामुळे रद्द झाल्याने १७ गुणांसह ते दुसऱ्या स्थानावर राहिले.