आजपासून रंगणार IPLचा थरार

एकता दर्शन : जगातील सर्वात मोठी समजली जाणारी क्रिकेट लीग म्हणजेच इंडियन प्रीमियर लीगचा १६ वा हंगाम विविध क्षेत्रातील दिग्गजांच्या उपस्थितीत आजपासून सुरू होत आहे. यावर्षी १० संघांमध्ये एकूण ७० सामने खेळवले जाणार असून आजचा पहिला सामना गुजरात टायटन्स विरुद्ध चेन्नई सुपर किंग्स यांच्यात खेळवला जाणार आहे, तर अंतिम सामना २१ मे रोजी होणार आहे.

इंडियन प्रीमियर लीगच्या कार्यक्रमाची सुरुवात सिने क्षेत्रातील अनेक दिग्गज कलाकारांच्या सादरीकरणाने होणार असून सलामीच्या सामन्याला संध्याकाळी ७ वाजून ३० मिनिटांनी सुरुवात होणार आहे. हा सामना आयपीएल १५ व्या हंगामाचा विजेता संघ असलेला गुजरात टायटन्स विरुद्ध चेन्नई सुपर किंग्स यांच्यात अहमदाबादमधील नरेंद्र मोदी स्टेडियममध्ये खेळवला जाणार आहे.

गुजरात टायटन्सचं कर्णधारपद हार्दिक पंड्या याच्याकडे आहे, तर चेन्नई सुपर किंग्सचं कर्णधारपद महेंद्रसिंह धोनी याच्याकडे आहे. घनिष्ठ मैत्री असलेले दोघेही कर्णधार आज एकमेकांच्या विरोधात खेळून आयपीएलच्या १६ व्या हंगामाला सुरुवात करतील.