इंडिजला हरवून भारताचा मालिकेवर कब्जा ; अक्षर पटेल विजयाचा हिरो

एकता दर्शन : भारत आणि वेस्ट इंडिज यांच्यात खेळल्या गेलेल्या दुसऱ्या एकदिवसीय सामन्यात भारतने इंडिजवर विजय मिळवत मालिकेत २-० अशी आघाडी घेतली.

प्रथम फलंदाजी करणाऱ्या वेस्ट इंडिजने भारताला विजयासाठी ३१२ धावांचे लक्ष्य दिले होते. भारताला अखेरच्या षटकात ३ चेंडूत विजयासाठी ६ धावांची गरज असताना कायली मेयर्सने टाकलेल्या चौथ्या चेंडूवर अक्षर पटेलने षटकार मारून सामना जिंकला. ज्यापद्धतीने तीन एकदिवसीय मालिकेतील पहिला सामना अखेरच्या षटकापर्यंत रंगला तसाच हा दुसरा सामनाही अखेरच्या षटकापर्यंत रंगला. दरम्यान, इंडिजकडून अल्झारी जोसेफ, आणि काइल मेयर्स यांनी भारताचे प्रत्येकी २ गडी बाद केले. तत्पूर्वी इंडिजच्या शाई होपने आपल्या कारकिर्दीतला १०० वा एकदिवसीय सामना खेळताना शतक केले.

वेस्ट इंडिजने नाणेफेक जिंकून प्रथम फलंदाजी करण्याचा निर्णय घेतला. काइल मेयर्स आणि शाई होप हे दोघे सलामीला उतरले. आपल्या संघाला चांगली सुरुवात करून देत असतानाच भारतीय गोलंदाज दीपक हुडाने काइल मेयर्सला ३९ धावांवर बाद केले. २२ व्या षटकात अक्षर पटेलने शामराह ब्रुक्सला ३५ धावांवर बाद केले, त्यापाठोपाठ चहलच्या गोलंदाजीवर ब्रॅंडन किंग शून्यावर माघारी परतला. शाई होपने आपल्या कारकिर्दीतला १०० वा एकदिवसीय सामना खेळताना १३ वे शतक केले, त्याला निकोलसची चांगली साथ मिळाली. भारतीय गोलंदाजांवर आक्रमण करताना निकोलसने ७४ धावांची खेळी करून भारतासमोर ३१२ धावांचे लक्ष्य ठेवले.

फोटो : ICC

विजयासाठी ३१२ धावांच्या लक्ष्याचा पाठलाग करताना भारताची सुरवात खराब झाली. ७९ धावसंख्या असताना भारतचे ३ गडी बाद झाले. श्रेयस अय्यर (६३) आणि संजू सॅमसन (५४) या दोघांनी ९९ धावांची भागीदारी करून भारताचा डाव सावरला. अक्षर पटेलने उत्कृष्ठ फटकेबाजी करत ३५ चेंडूत ३ चौकार व ५ षटकारांच्या मदतीने नाबाद ६४ धावा केल्या. त्याला आवेशने चांगली साथ दिली. अखेरच्या षटकात ३ चेंडूत विजयासाठी ६ धावांची गरज असताना कायली मेयर्सने टाकलेल्या चौथ्या चेंडूवर अक्षरने षटकार मारल्याने भारताने विजयश्री खेचून आणला आणि २-० अशा आघाडीने मालिकेवर कब्जा केला.