दिनांक १ जुलै रोजी पुणे येथे 'कृषी जीवन गौरव पुरस्कार' वितरण सोहळा : सुरेश भोंगळे यांची माहिती

दिनांक १ जुलै रोजी सकाळी ११ ते दुपारी २ यावेळेत शिवाजीनगर पुणे येथील कृषी महाविद्यालय परिसरातील शिरनामे हॉल या ठिकाणी खासदार श्रीनिवास पाटील यांच्या हस्ते 'कृषी जीवन गौरव पुरस्कार' वितरण सोहळा आयोजित करण्यात आल्याची माहिती पुणे कृषी महाविद्यालय माजी विद्यार्थी संघटनेचे संचालक सुरेश भोंगळे यांनी दिली आहे.

पुणे : संघटनेचा ३४ वा स्थापना दिन व कृषी दिन यानिमित्त 'कृषी जीवन गौरव पुरस्कार' वितरण सोहळा आयोजित केला असून विशेष सेवा कार्याबद्दल महाराष्ट्र लोकसेवा अयोग्य अध्यक्ष किशोरराजे निंबाळकर, विधान परिषदेचे आमदार अरुण लाड, सहकारी साखर कारखान्याचे चेअरमन जी.डी. लाड, गोकुळ दूधसंघ (कोल्हापूर) संस्थापक अध्यक्ष अरुण नरके, कृषी शिक्षणतज्ज्ञ व डेक्कन शुगर टेक्नॉलिजीस्ट असोसिएशनचे उपाध्यक्ष बाबासाहेब पवार, कृषी शास्त्रज्ञ डॉ. व्ही.एस. बावस्कर या मान्यवरांना 'कृषी जीवन गौरव पुरस्काराने' सन्मानित करण्यात येणार आहे.

पुणे कृषी महाविद्यालयातील माजी विद्यार्थी संघटना देश पातळीवर कार्यरत असून देश व राज्याच्या प्रशासन विभागात कृषी पदवीधरांचे मोठे योगदान आहे. या संघटनेचे देश व परदेशात सदस्य असून सामाजिक, सहकार, शैक्षणिक, कृषी, औद्योगिक, आणि राजकीय क्षेत्रातही कृषी पदवीधरांचा मोठा सहभाग राहिला असल्याचे सुरेश भोंगळे यांनी सांगितले.

राहुरी येथील महात्मा फुले कृषी विद्यापीठाने शिवाजीनगर पुणे येथील कृषी महाविद्यालयाच्या परिसरात २० गुंठे जागा उपलब्ध करून दिली असून संबंधित जागेत शेतकऱ्यांना कृषी विषयक विविध समस्यांवर मार्गदर्शन करण्यासाठी पूर्णवेळ कृषीतज्ज्ञाची उपलब्धता, शेतकरी प्रशिक्षणासाठी सर्व सोयींसह प्रशिक्षण हॉल, शेतकऱ्यांना राहण्याची व्यवस्था, संघटनेचे मध्यवर्ती व अत्याधुनिक कार्यालय अशी सुसज्ज वास्तू उभारण्याचे नियोजन करण्यात येणार असल्याचेही सुरेश भोंगळे यावेळी स्पष्ट केले आहे.

कोरोना महामारीच्या संकटामुळे गेली ३ वर्षे 'कृषी गौरव पुरस्कार' सोहळा होऊ शकला नाही. कोरोनाचे शासकीय निर्बंध सध्या हटविण्यात आल्याने सदरचा पुरस्कार सोहळा यावर्षी संपन्न होत आहे, त्यामुळे कृषी पदवीधारकांनी या कार्यक्रमास उपस्थित रहावे असे आवाहन संघटनेचे अध्यक्ष डॉ. बळवंतराव जगताप, उपाध्यक्ष सर्जेराव जेधे, साखर आयुक्त शेखर गायकवाड, सचिव डॉ. सुरेश पवार, डॉ. जनार्दन कदम, खजिनदार दिलीप वाईकर, संचालक सुरेश भोंगळे व पदाधिकारी यांनी केले आहे.