श्रीराम व जवाहर भागीदारी करार कायदेशीरच : श्रीमंत संजीवराजे

एकता दर्शन, फलटण : श्रीराम आणि जवाहर हे दोन्ही साखर कारखाने सहकारी असुन यांच्यात झालेला भागीदारी करार हा बेकायदेशीर नसल्याचे स्पष्ट करीत ॲड.नरसिंह निकम यांनी श्रीरामवर केलेले आरोप निराधार आहेत, या आरोपांमागे दुसरेच कोण तरी नाही ना? असा सवाल व्यक्त करीत श्रीराम सहकारी आणि जवाहर सहकारी या दोन्ही कारखान्यात झालेला भागीदारी करार हा कायदेशीरच असल्याचा पुनरुच्चार श्रीराम सहकारी साखर कारखान्याचे विद्यमान संचालक श्रीमंत संजीवराजे नाईक निंबाळकर यांनी पत्रकार परिषदेत केला.

श्रीराम कारखाना आणि जवाहर यांच्यात झालेल्या भागीदारी करारा संबधी ॲड.निकम यांनी केलेल्या आरोपांसंदर्भात भूमिका स्पष्ट करण्यासाठी आयोजित पत्रकार परिषदेत संजीवराजे बोलत होते. यावेळी श्रीरामचे चेअरमन डॉ.बाळासाहेब शेंडे, संचालक संतोष खटके, नितीन भोसले, सांगळे, कारखाना व्यवस्थापक पाटील उपस्थित होते.

श्रीराम अवसायानात येण्याची वेळ असताना या कारखान्याला कोणीही हात लावायला येत नव्हते. श्रीमंत रामराजे यांची भूमिका ऊस उत्पादक शेतकरी सभासद व कामगार यांच्या हिताची होती. शरद पवार यांनी कलप्पा अण्णा आवडे यांना श्रीराममध्ये लक्ष घालायला विनंती केल्यावरून आवडे यांनी श्रीराम कारखाना भागीदारी तत्वावर चालविण्यास घेतला. श्रीरामची आर्थिक परिस्थिती बदलत गेली. प्रतिकूल परिस्थितीत कामगारांनीही त्याग करून कारखान्याला साथ दिली म्हणून आर्थिक गर्तेत अडकलेला श्रीराम कारखाना आज आर्थिक उर्जित सुस्थितीमध्ये असल्याचे संजीवराजे यांनी यावेळी निदर्शनास आणून दिले.

तालुक्यातील कारखाने गाळप क्षमता वाढीच्या स्पर्धेतून एकमेकांवर कुरघोडी करण्याचा प्रयत्न करत आहे. श्रीराम कारखाना वेळेवर व सर्वाधिक पेंमेट करण्यात आघाडीवर असल्याने श्रीरामला अडचणीत आणण्याचा हा प्रयत्न असून विरोधक श्रीराम बाबत बिनबुडाचे व दिशाभूल करणारे आरोप करीत आहेत. तालुक्यात श्रीराम हा एकमेव सहकारी तत्वावर चालणारा कारखाना आहे. सहकार टिकला पाहिजे या जाणिवेतून सभासद शेतकरी कामगार यांनी कारखान्याला आजअखेर साथ दिली. सर्वांच्या साथीतूनच श्रीरामला गतवैभव प्राप्त होत आहे. श्रीराम आणि जवाहर यांच्यातील भागीदारी करारास साखर आयुक्त आणि सहकारमंत्र्याच्या अध्यक्षतेखालील समितीने मान्यता दिल्याचे सांगत करार कायदेशीर, पारदर्शक आणि कायद्यातील तरतुदींनुसारच झाला असल्याचे संजीवराजे यांनी यावेळी स्पष्ट केले.

ऊस उत्यादकांना सर्वाधिक दर देण्याला प्राधान्य देण्यात आले आहे. अर्कशाळेतूनही आर्थिक फायदा होणार आहे. इथेनॉल उत्पादन घेतले जाणार आहे. देशी विदेशी दारू उत्पादनाचे परवाने इतरांना दिल्याने अर्कशाळेस उत्पादन मिळेल. करारानुसार श्रीरामला तोटा न होता फायदाच होणार असल्याचे संजीवराजे यांनी यावेळी सांगितले.

श्रीराम कारखाना कर्जमुक्तीकडे निघाला असून आता फक्त १३ कोटी कर्ज आहे. ८० कोटी कर्ज असल्याचा विरोधकांचा दावा खोटा असल्याचे विद्यमान चेअरमन डॉ.बाळासाहेब शेंडे यांनी निदर्शनास आणून देत लवकरच श्रीरामची गाळप क्षमता १० हजार मे.टन होणार असून शेतकऱ्यांना लाभदायी असणारे विविध प्रकल्प उभारले जात आहेत, जादा गाळप क्षमतेसाठी ऊस उत्पादक शेतकरी व कामगार यांना मदत व मार्गदर्शन केले जात असल्याचे डॉ.शेंडे यांनी यावेळी सांगितले.

श्रीराम कारखाना हा तालुक्यातील एकमेव सहकारी तत्वावर चालणार कारखाना आहे. या कारखान्यात ऊस उत्यादक शेतकरी सभासदांचे हित जपले जात आहे. श्रीराम आता भरारी घेत असून पुन्हा या कारखान्यास गतवैभव प्राप्त होत आहे. ऊस उत्पादक शेतकरी सभासदांना सर्वाधिक दर व कामगारांना वेळेत पगार यावर कारखाना व्यवस्थापन लक्ष केंद्रित करीत असल्याचे चेअरमन डाॅ.शेंडे यांनी यावेळी निदर्शनास आणून दिले.