सरपंच, ग्रामसेवकांच्या प्रामाणिक कामातून भारत महासत्ता होईल

फलटण : सरपंच आणि ग्रामसेवक गावच्या ग्रामपंचायतमधील महत्त्वाचे घटक असून गावचा विकास याच दोन घटकांवर अवलंबून असतो, त्यामुळे या दोघांमध्ये योग्य समन्वय, सकारात्मक विचार, प्रामाणिक काम करण्याची इच्छाशक्ती असेल तर भारत महासत्ता होवू शकतो, असे प्रतिपादन भास्करराव पेरे पाटील यांनी केले.

श्रीमंत मालोजीराजे व श्रीमंत शिवाजीराजे स्मृती महोत्सवातील आयोजित कार्यक्रमात "ग्रामविकासाचा आदर्श" या विषयावर पेरे पाटील बोलत होते. याप्रसंगी कार्यक्रमाचे अध्यक्ष व श्रीराम सहकारी साखर कारखान्याचे चेअरमन डॉ.बाळासाहेब शेंडे, श्रीमंत मालोजीराजे स्मृती प्रतिष्ठानचे सचिव माजी प्राचार्य विश्वासराव देशमुख, माजी प्राचार्य अरविंद निकम, डि.के.पवार, शिवाजीराव घोरपडे, राजीव नाईक निंबाळकर, अर्जुन रुपनवर उपस्थित होते.

राज्यातील प्रत्येक ग्रामपंचायतीने पिण्याचे स्वच्छ पाणी, फळांची झाडे लावणे, स्वच्छता, संस्कारी शिक्षण, ज्येष्ठांचा संभाळ करणे या पाच गोष्टी केल्या पाहिजेत. पाऊस गरजेपेक्षा जास्त पडतो. मात्र, पडलेल्या पावसाच्या पाण्याचे नियोजन योग्य पद्धतीने केले जात नसल्याचे सांगत राज्यकर्ते फक्त राजकारण करतात, खरा विकास करायचा असेल तर प्रत्येकाने काम केले पाहिजे, अशी अपेक्षा पेरे पाटील यांनी यावेळी व्यक्त केली.

राज्यातील २८ हजार ग्रामपंचायतींची गटारे, संडास उघड्यावर आहेत. चारशे वर्षांपूर्वी छत्रपती शिवाजी महाराजांनी शौचालयाचा वापर केला होता म्हणजे शौचालय संकल्पना ४०० वर्षांपूर्वीची असल्याचे सांगत ग्रामपंचायतीने गावातील मुला-मुलींना संस्कारी शिक्षण द्यावे, चांगल्या गोष्टी समाजाला सांगाव्यात, शेतकरी जगण्यासाठी मदत करावी, प्रत्येक घरातून कचरा गोळा करावा, असे विविध सल्ले पेरे पाटील यांनी यावेळी दिले.

ज्याप्रमाणे राष्ट्र विकास व निर्मितीसाठी महापुरुषांनी त्रास घेतला त्याप्रमाणे ग्रामस्थांनी त्रास घ्यावा. आजपर्यंत राज्यात ७ हजार आमदार झाले. मात्र, यातील ७ गावंही चांगली नाहीत. त्यामुळे राज्यकर्ते काय करत होते, असा प्रश्न उपस्थित करत सर्वोच्च न्यायालयही ग्रामपंचायतचे अधिकार तोडू शकले नाहीत एवढे चांगले अधिकार ग्रामपंचायतींना आहेत. तुमचे निर्णय तुम्ही घ्या, गरिबांसाठी चांगले काम करा, गरिबांचे जगणे सुकर करा, महापुरुषांचे स्वप्न साकार करा, अशी विनंती पेरे पाटील यांनी यावेळी सरकारकडे केली.

प्रारंभी उपस्थित मान्यवरांच्याहस्ते श्रीमंत शिवाजीराजे नाईक निंबाळकर, श्रीमंत मालोजीराजे नाईक निंबाळकर यांच्या प्रतिमांना पुष्पहार अर्पण करून अभिवादन करण्यात आले. स्वागत व प्रास्ताविक डॉ.प्रा.संजय दीक्षित यांनी केले. सूत्रसंचालन प्रा.नीलम देशमुख यांनी केले. कार्यक्रमास फलटण एज्युकेशन सोसायटी व श्रीमंत मालोजीराजे प्रतिष्ठानचे पदाधिकारी, ग्रामीण भागातील विविध ग्रामपंचायतींचे सरपंच, उपसरपंच, ग्रामपंचायत सदस्य, ग्रामसेवक, ग्रामस्थ मोठ्या संख्येने उपस्थित होते.