वृक्ष लागवडीसोबत वृक्षसंवर्धन अनिवार्य : डॉ. वैशाली शिंदे

फलटण : पर्यावरण संतुलनासाठी वृक्ष लागवड करण्याबरोबरच रोपण केलेल्या झाडांचे संवर्धन होणे अनिवार्य असल्याचे सांगत निसर्गाच्या संरक्षणासाठी प्रत्येक नागरिकाने प्रयत्न केले पाहिजेत असे आवाहन आयडियल किड्स इंटरनॅशनल स्कूलच्या प्रमुख डॉ. वैशालीताई शिंदे यांनी केले आहे.

जागतिक निसर्ग संवर्धन दिनानिमित्त आयोजित कार्यक्रमात त्या बोलत होत्या. याप्रसंगी ज्येष्ठ पत्रकार प्रा. रमेश आढाव, प्रमुख पाहुणे म्हणून जाधववाडी ग्रामपंचायतचे माजी सरपंच मनिष जाधव, विद्यार्थी, आदी मान्यवर उपस्थित होते.

देशातील जंगलाचे प्रमाण झपाट्याने कमी होत असून त्या जागेवर सिमेंटच्या इमारती उभारल्या जात आहेत, वृक्षतोड होत आहे. याचे निसर्ग व मानवी जीवनावर परिणाम होत आहे. वृक्षतोडीमुळे अस्तित्वातील नैसर्गिक जलसाठे कमी होणे, जागतिक तापमानवाढीला सामोरे जावे लागणे, अनियमित ऋतुचक्राचा सामना करावा लागणे आदी दुष्परिणामांच्या चक्रव्यूहात निसर्ग व मानव अडकला असल्याचे सौ. शिंदे यांनी यावेळी स्पष्ट केले.

शाळेच्या परिसरात वृक्षारोपण करताना ज्येष्ठ पत्रकार प्रा. रमेश आढाव

निसर्गवाद्यांचे निसर्गरक्षणाचे प्रयत्न वाढत्या शहरीकरणात लुप्त होत असल्याची खंत व्यक्त करत 'झाडे लावा झाडे जगवा'चा जागर व्यापक करून प्रत्येकाने रोपण केलेली झाडे जगवली तरच वृक्षलागवड भविष्यात उपयुक्त ठरेल. असे मत सौ. शिंदे यांनी यावेळी व्यक्त केले. दरम्यान जागतिक संवर्धन दिनानिमित्त उपस्थित मान्यवरांच्या हस्ते आयडियल किड्स इंटरनॅशनल स्कुलच्या परिसरात वृक्ष लागवड करण्यात आली.