पालखी सोहळ्यातील भाविकांची गैरसोय होणार नाही याची प्रशासनाने दक्षता घ्यावी : पालकमंत्री बाळासाहेब पाटील यांची सूचना

संतश्रेष्ठ श्री ज्ञानेश्वर महाराज पालखी सोहळा सातारा जिल्ह्यात येण्यापूर्वी पालखी विसावा, मुक्काम, ठिकाणे व परिसरात पालखी सोहळ्यातील भाविकांची कोणतीही गैरसोय होणार नाही याची दक्षता संबधीत शासकीय यंत्रणांनी घ्यावी यासाठी सातारा जिल्ह्यातील पालखी मुक्काम ठिकाणचे योग्य नियोजन झाले पाहिजे, अशा सूचना सातारा जिल्ह्याचे पालकमंत्री बाळासाहेब पाटील यांनी संबधीत यंत्रणांना दिल्या आहेत.

फलटण : संतश्रेष्ठ श्री ज्ञानेश्वर माऊलींचा पालखी सोहळा सातारा जिल्ह्यात आगमन करणार असल्याच्या पार्श्वभूमीवर जिल्ह्यातील पालखी विसावा आणि मुक्काम ठिकाणची पाहणी करण्यासाठी पालकमंत्री आले होते. याप्रसंगी आमदार दीपक चव्हाण, जिल्हाधिकारी शेखर सिंह, जिल्हा परिषदेचे मुख्य कार्यकारी अधिकारी विनय गौडा, जिल्हा पोलीस अधीक्षक अजयकुमार बन्सल, निवासी उपजिल्हाधिकारी सुनील थोरवे, वाईचे प्रांत अधिकारी राजेंद्र कुमार जाधव, फलटणचे प्रांत अधिकारी डॉ. शिवाजीराव जगताप, सार्वजनिक बांधकाम विभागाचे अधीक्षक अभियंता संजय मुनगीलवार यांच्यासह विविध खात्यांचे प्रमुख अधिकारी, स्थानिक ग्रामस्थ उपस्थित होते.

दत्त घाट, नीरा नदी, लोणंद, तरडगाव, फलटण, विडणी, पिंप्रद, बरड या ठिकाणांची वारकरी व भाविकांसाठी करण्यात आलेल्या सुविधांचा पाहणीदौरा पालकमंत्र्यांनी केला. पालखी सोहळ्याचा जिल्ह्यात सहा दिवस मुक्काम असून, पालखी सोहळ्यात येणाऱ्या सर्व वारकऱ्यांना स्वच्छ पिण्याचे पाणी यासह अन्य सोयीसुविधा उपलब्ध करून द्याव्यात. संतश्रेष्ठ श्री ज्ञानेश्वर महाराज पालखीचे जिल्ह्यातील पालखीतळ व मार्गावरील रस्त्याची दुरुस्ती, स्वच्छता, पालखीतळावर पुरेशी तात्पुरती शौचालये, शौचालयाच्या ठिकाणी पाणी, वीज आदी सुविधा करण्यात याव्यात. पिण्याच्या पाण्याची कमतरता होणार नाही याची दक्षता घ्यावी, अशा सूचनाही बाळासाहेब पाटील यांनी दिल्या.

पालखी सोहळ्यादरम्यान पर्यायी वाहतूक व्यवस्थेचे योग्य नियोजन करावे. प्रशासनाने स्थानिक लोकप्रतिनिधी व ग्रामस्थांचे सहकार्य घेऊन पालखी सोहळा यशस्वी करावा, पालखी विसाव्याच्या ठिकाणी मुख्य रस्त्यापासून प्रवेशासाठी व बाहेर पडण्यासाठी रस्ता तयार करावा, पालखी मार्गावरील व मुक्कामाच्या ठिकाणी विजेचे खांब, तारा यांची तपासणी करावी, वारकऱ्यांच्या व भाविकांच्या सोईसाठी ठिकठिकाणी पुरेशी आरोग्य व्यवस्था उपलब्ध करण्याचे निर्देशही पालकमंत्री बाळासाहेब पाटील यांनी प्रशासनाला दिले.