नरवीर जिवाजी महाले शूरतेचे प्रतीक

स्वराज्याची स्थापना करताना छत्रपती शिवाजी महाराजांनी अनेक शूरवीर मावळ्यांना बरोबर घेऊन रयतेच्या राज्याची स्थापना केली, यामध्ये नरवीर जीवा महाले यांची भूमिका महत्त्वपूर्ण होती. वीर जीवा महाले छत्रपती शिवाजी महाराजांचे अंगरक्षक म्हणून कार्यरत होते. अफजल खान भेटीदरम्यान अंगरक्षक म्हणून महाराजांचे केलेले रक्षण आजही आपल्या सर्वांसाठी शूरतेचे प्रतीक असल्याचे प्रतिपादन ज्येष्ठ पत्रकार प्रा.रमेश आढाव यांनी केले.

नरवीर जिवाजी महाले यांच्या पुण्यतिथीनिमित्त येथील संत सावतामाळी मंदिरात आयोजित केलेल्या अभिवादन कार्यक्रमात ते बोलत होते. यावेळी सामाजिक कार्यकर्ते बापूराव काशीद, गोविंद भुजबळ, विडणी गावचे माजी सरपंच शरद कोल्हे, समता परिषदेचे फलटण तालुकाध्यक्ष बापूराव शिंदे, कोळकी ग्रामपंचायतचे माजी उपसरपंच वैभव नाळे, जाधवाडी ग्रामपंचायत सदस्य राहुल शिंदे, सुभाष अभंग, सुभाष शिंदे, पत्रकार विकास शिंदे, विकास अहिवळे, कोळकीचे तंटामुक्ती अध्यक्ष दत्ता नाळे, ग्रामपंचायत सदस्य बाळासाहेब काशीद, महेश पवार, अवि साळुंखे, संजय पवार, किशोर पवळ आदी मान्यवर उपस्थित होते.

प्रारंभी नरवीर जिवाजी महाले यांच्या प्रतिमेस उपस्थित मान्यवरांच्याहस्ते पुष्पहार अर्पण करून अभिवादन करण्यात आले. याप्रसंगी बाळासाहेब काशीद बापूराव काशीद यांनी जिवाजी महाले यांच्या जीवनावर आपले मनोगत व्यक्त केले.

उपस्थितांचे स्वागत, प्रास्ताविक, व आभार अंबादास दळवी यांनी मानले. कार्यक्रमास विडणी, फरांदवाडी, ठाकूरकी, कोळकी, फलटण शहरातील विविध क्षेत्रातील मान्यवर उपस्थित होते.