बार्टीच्या संविधान दिंडीचे फलटणमध्ये होणार आगमन

एकता दर्शन : महामानव डॉ.बाबासाहेब आंबेडकर यांच्या विचारांचा प्रसार व प्रचार, भारतीय संविधानातील स्वातंत्र्य, समता, बंधुत्व या नैतिक मूल्यांची माहिती पालखी सोहळ्यात जण-सामान्यांपर्यंत पोहचावी या उद्देशाने पुणे येथील डॉ.बाबासाहेब आंबेडकर संशोधन व प्रशिक्षण संस्थेच्या (बार्टी) वतीने संविधान दिंडीचे प्रतिवर्षी आयोजन करण्यात येत असते. यावर्षीही ज्ञानेश्वर माऊलींच्या पालखी सोहळ्यात संविधान दिंडी सहभागी झाली असून आज दि.२१ रोजी फलटण येथे संविधान दिंडीचे आगमन होणार आहे.

महाराष्ट्राला भागवत व भक्ती संप्रदायाची मोठी परंपरा असून संत विचारांचा मोठा वारसा आहे. प्रतिवर्षी आळंदी ते पंढरपूर पर्यंत लाखो वारकरी माऊलींच्या पालखी सोहळ्यात सहभागी होत असतात. या सोहळ्यातील सहभागी समाज बांधवांच्यात संविधानातील मूलभूत तत्वांचा प्रचार व प्रसार करण्यासाठी वारी हे प्रभावी माध्यम असल्याने बार्टीच्या वतीने संविधान दिंडी काढण्यात येत असते.

संविधान दिंडी संकल्पनेत समता रथ, जण-जागृती विषयक कार्यक्रम, प्रचार व प्रसाराची प्रचलित साधन सामग्री, संविधान उद्देशिका वाचन व वाटप, अभंग कीर्तनाच्या माध्यमातून समाज जागृती, ऑडिओ-व्हिडीओ प्रसार माध्यमांचा वापर आदी साधनांचा समावेश संविधान दिंडी संकल्पनेत करण्यात आला आहे.

संविधान दिंडी आज दि.२१ रोजी माऊलींच्या पालखी सोहळ्याबरोबरच फलटण शहरात प्रवेश करणार असून येथील पालखी तळावर या दिंडीचे विविध कार्यक्रम मान्यवरांच्या उपस्थितीत सादर केले जाणार आहेत. या सर्व कार्यक्रमांना माऊली भक्तांनी उपस्थित राहून सहकार्य करावे असे आवाहन बार्टीचे विस्तार व सेवा विभाग प्रमुख डॉ.सत्येंद्रनाथ चव्हाण यांनी केले आहे.

संविधान दिंडीमध्ये डॉ.बाबासाहेब आंबेडकर संशोधन व प्रशिक्षण संस्थेचे पदाधिकारी, अधिकारी, कर्मचारी, समतादूत कर्मचारी सातारा जिल्हा प्रकल्प अधिकारी आदी सहभागी झाले आहेत.