गुणवरे-बरड रस्त्याच्या कामासाठी २ कोटी रुपये

एकता दर्शन: फलटण-कोरेगाव विधानसभा मतदारसंघाच्या २१ गावांतील रस्त्यांचा व अन्य पायाभूत सुविधांचा विकास करण्यासाठी सुमारे ५० कोटी रुपयांची आर्थिक तरतूद राज्य शासनाच्या वतीने करण्यात आली असून या कामामध्ये बरड ते गुणवरे रस्त्याच्या कामासाठी २ कोटी रुपयांचा निधी उपलब्ध करून देण्यात आला असून लवकरच या रस्त्याचे काम सुरु होणार असल्याची माहिती आमदार दीपक चव्हाण यांनी पत्रकार परिषदेत दिली.

येथील श्रीमंत रामराजे नाईक निंबाळकर यांच्या निवासस्थानी आयोजित पत्रकार परिषदेत आमदार चव्हाण बोलत होते. यावेळी जिल्हा परिषदेचे माजी अध्यक्ष श्रीमंत संजीवराजे नाईक निंबाळकर, माजी नगराध्यक्ष पांडुरंग गुंजवटे, नितीन भोसले, राहुल निंबाळकर उपस्थित होते.

या वर्षीच्या पुरवणी अंदाजपत्रकात फलटण-कोरेगाव विधानसभा मतदारसंघातील रस्ते व अन्य पायाभूत सुविधांच्या कामांचा समावेश केला आहे. श्रीमंत रामराजे यांच्या प्रयत्नामुळे हा निधी उपलब्ध झाला असून आणखी मोठ्या प्रमाणात निधी तालुक्याच्या विकास कामांसाठी राज्य शासन उपलब्ध करून देणार आहे. त्यामुळे तालुक्यातील विकासकामे मोठ्या प्रमाणावर हाती घेतली जाणार असल्याचे आमदार चव्हाण यांनी पत्रकार परिषदेत सांगितले.

पत्रकार परिषदेत बोलताना आमदार दीपक चव्हाण 

अनेक दिवसांपासून गुणवरे-बरड रस्ता दुरुस्तीची मागणी या भागातील नागरिक करत होते. या रस्त्याच्या कामासाठी आता सुमारे २ कोटी रुपयांचा निधी उपलब्ध करून देण्यात आल्याने या भागातील नागरिकांच्यात समाधान व्यक्त केले जात आहे.