वाहनावरील ताबा सुटल्याने चालकाचा जागीच मृत्यू

एकता दर्शन : फलटण-पुसेगाव मार्गावरील ढवळ (ता.फलटण) गावच्या हद्दीतून जाणाऱ्या चारचाकी पिकअप वाहनावरील चालकाचा ताबा सुटल्याने वाहन झाडावर आदळून झालेल्या अपघातात चालकाचा जागीच मृत्यू झाला आहे.

शौकत दिलावर शेख (वय ६० वर्षे, राहणार हडको कॉलनी, फलटण जि.सातारा) असे मयत झालेल्या चालकाचे नाव असून दिनांक २४ रोजी दुपारी ३ वाजण्याच्या सुमारास अपघाताची घटना घडली आहे.

आपल्या ताब्यातील चारचाकी पिकअप वाहन पुसेगाववरून फलटणकडे घेवुन जात असताना फलटण तालुक्यातील ढवळ येथील हॉटेल सागर नजीक आल्यानंतर चालक शेख यांचा वाहनावरील ताबा सुटला व वाहन थेट रस्त्याच्या कडेला असणाऱ्या झाडावर जोरात आदळले. या अपघातात चालक शेख यांचा मृत्यू झाला आहे.

सदर अपघाताच्या घटनेची फिर्याद जुबेर लियाकत शेख (वय ३० वर्षे, राहणार बिबी ता.फलटण) यांनी दिली असून अधिक तपास पोलीस उपनिरीक्षक दिक्षीत करीत आहेत.