'प्रोग्रेसिव्ह'मधील रक्तदान शिबिरास उत्स्फूर्त प्रतिसाद

फलटण: जागतिक महिला दिनाच्या पार्श्वभूमीवर प्रोग्रेसिव्ह कॉन्व्हेंट स्कूल अँड ज्युनिअर कॉलेज (कोळकी, ता.फलटण) आणि लायन्स क्लब ऑफ फलटण गोल्डन यांच्या संयुक्त विद्यमाने फलटण येथे आयोजित केलेल्या रक्तदान शिबिरास शहरातील अनेकांनी उत्स्फूर्त प्रतिसाद देऊन शिबिराचा लाभ घेतला

या शिबिरात जवळपास ४० रक्तदात्यांनी रक्तदान केले. प्रारंभी उपस्थित मान्यवरांच्या हस्ते सरस्वती, राजमाता जिजाऊ, क्रांतीज्योती सावित्रीबाई फुले यांच्या प्रतिमांचे पूजन झाल्यानंतर शिबिराचे उद्घाटन राजनकाका देशमुख महाराज यांच्याहस्ते फित कापून करण्यात आले.

यावेळी सरस्वती शिक्षण संस्थेच्या व्यवस्थापकीय संचालिका उपस्थितांना मार्गदर्शन करताना म्हणाल्या, समाजाप्रती सेवा करण्याचा संस्कार विद्यार्थ्यांमध्ये असला पाहिजे. त्यांनी आत्मसात केलेल्या ज्ञानसंपदाचा उपयोग सामाजिक कर्तव्य म्हणून समाजव्यवस्थेत केला पाहिजे. असे केल्याने दातृत्वाची भावना वाढीस लागेल. शाळांमध्ये विविध सामाजिक उपक्रम राबविले गेले पाहिजेत. शिक्षक, विद्यार्थी, पालक यांच्यात समन्वय असणे गरजेचे आहे.

राजनकाका देशमुख महाराज म्हणाले, रक्तदान हे श्रेष्ठ दान आहे. लोकांनी जीवनात आनंदी, समाधानी असणे गरजेचे आहे. समाजातील महिलांनी आलेल्या संकटांना सामोरे जाऊन परिस्थितीतून मार्ग काढावा व आनंदी जीवन जगावे.

नीलम देशमुख यांनी यावेळी महिला सक्षमीकरण विषयावर सखोल माहितीचे मार्गदर्शन केले.

दरम्यान, विशेष उल्लेखनीय काम करणाऱ्या कर्तृत्वान महिला, हॉस्पिटल व शाळांमधील सेविका महिला, मुलगीरुपी एक अपत्य असणाऱ्या माता यांचा लायन्स क्लब ऑफ फलटण गोल्डन यांच्यावतीने सन्मान करण्यात आला.

या शिबिरात प्रोग्रेसिव्ह कॉन्व्हेंट स्कूलचे प्राचार्य अमित सस्ते, पर्यवेक्षिका सौ.माधुरी माने, सौ.सुवर्णा निकम, योगिता सस्ते, ज्ञानेश्वर जाधव, सौ.उज्ज्वला निंबाळकर, ऋषिकेश बिचुकले, पत्रकार नासिरभाई शिकलगार, राजू बनसोडे, उद्धव बोराटे यांच्यासह प्रोग्रेसिव्ह स्कूल व लायन्स क्लब ऑफ फलटण गोल्डनचे पदाधिकारी व कर्मचारी सहभागी झाले होते.