प्राचार्य शिवाजीराव भोसले स्मृती समितीच्यावतीने अमर शेंडे होणार सन्मानित

फलटण : प्राचार्य शिवाजीराव भोसले स्मृती समिती, पुणे यांच्यावतीने महाराष्ट्र साहित्य परिषद शाखा फलटणचे कार्यवाह तथा नवोदित लेखक अमर शेंडे यांचा वाचन संस्कृती समृद्ध करण्यासाठी दिलेल्या योगदानाबद्दल प्राचार्य शिवाजीराव भोसले यांच्या जयंतीदिनी विशेष सन्मान होणार असल्याची माहिती, स्मृती समितीचे अध्यक्ष प्रा. मिलिंद जोशी यांनी दिली.

शुक्रवार, दि. १५ जुलै रोजी सायंकाळी ६ वाजता पुणे येथील एस.एम.जोशी सोशालिस्ट फाउंडेशन सभागृहात खासदार श्रीनिवास पाटील यांच्या प्रमुख उपस्थितीत "प्राचार्य शिवाजीराव भोसले स्मृती सन्मान" समारंभ पार पडणार आहे. यावर्षी प्रसिद्ध लेखक, वक्ते प्राचार्य डॉ. यशवंत पाटणे यांना 'प्राचार्य शिवाजीराव भोसले स्मृती सन्मान' जाहीर झाला आहे. श्रवण संस्कृती समृद्ध करण्यासाठी प्रयत्नशील राहिलेल्या चतुरंग प्रतिष्ठानचे विद्याधर निमकर यांचा यावेळी विशेष सन्मान होणार असून वाचन संस्कृती समृद्ध करण्यासाठीच्या योगदानाबद्दल फलटणचे अमर शेंडे यांनाही सन्मानित करण्यात येणार आहे.

ज्येष्ठ पत्रकार तथा साहित्यिक रवींद्र बेडकिहाळ यांच्या मार्गदर्शनाखाली अमर शेंडे गेली २० वर्षे वृत्तपत्र, साहित्य, शिक्षण व सांस्कृतिक क्षेत्रात कार्यरत आहेत. मराठी वृत्तपत्रसृष्टीचे जनक ‘दर्पण’कार आचार्य बाळशास्त्री जांभेकर यांच्या कार्यावर आधारित ‘बाळशास्त्री’ चरित्र व ‘यशवंतराव चव्हाण विचारधन एक सुवर्ण ठेवा’ या साहित्यकृती शेंडे यांनी प्रकाशित केल्या आहेत.

साप्ताहिक लोकजागर दिवाळी अंक, विविध विषयांवरील स्मरणिका, गौरव ग्रंथ आदींच्या संपादनातही शेंडे यांनी आपला सहभाग नोंदवला असून त्यांनी लिहिलेले ‘मुंबईचे शिल्पकार नामदार जगन्नाथ तथा नाना शंकरशेट’ यांचे जीवन चरित्र महाराष्ट्र राज्य साहित्य आणि संस्कृती मंडळाच्या माध्यमातून प्रकाशनाच्या वाटेवर आहे. सामाजिक, सांस्कृतिक, साहित्यिक आदी विषयांवरील त्यांचे लेखन विविध नियतकालिकांमधून प्रसिद्ध झाले आहे. वाचन संस्कृतीच्या समृद्धीसाठी सुरू असलेल्या योगदानाबद्दल अमर शेंडे यांचा विशेष सन्मान होणार असून त्यांचे विविध क्षेत्रातून अभिनंदन होत आहे.