हत्ती गवताच्या पिकात गांजाची लागवड ; उपळवेतील घटना

फलटण (एकता दर्शन) : तालुक्यातील उपळवे गावातील शेतकऱ्यांनी शेतात लावलेली गांजाच्या झाडांचा ग्रामीण पोलिसांनी पर्दापाश करीत सुमारे १३ किलो वजनाचा ५ लाख २४ हजार रूपये किमतीचा गांजा हस्तगत केला असुन दोघांवर अंमली पदार्थ वनस्पती बेकायदा लागवड केल्याप्रकरणी ग्रामीण पोलिसांनी गुन्हा दाखल केला आहे. या घटनेमुळे शेतकरी वर्गात आश्चर्य व्यक्त केले जात आहे.

सागर हिंदुराव लंभाते व हिंदुराव दादू लंभाते दोघे रा. उपळवे (ता. फलटण) अशी आरोपींची नावे आहेत. लंभाते यांच्या शेतातील दाट प्रमाणात आलेल्या गवती वनस्पतीत गांजाची झाडे लावली असल्याची गोपनीय माहिती ग्रामीण पोलिसांना मिळाल्यानंतर ग्रामीण पोलिस निरीक्षक धन्यकुमार गोडसे यांच्यासह पोलीस अधिकारी सागर आरगडे, पोलीस नाईक जगदाळे, काशीद, कुंभार, सुर्यवंशी, पोलीस कॉन्स्टेबल जगदाळे, नायब तहसीलदार सौ. बोबडे, कृषी पर्यवेक्षक सावंत, राऊत वजनकाटा आदींनी संशयिताच्या शेतावर छापा टाकला असता हत्तीगवताच्या पिकात गांजाची झाडे आढळून आली.

पोलिसांनी सुमारे १३ं किलो वजन असलेला ५ लाख २४ हजार रूपये किंमतीचा गांजा लंभातेच्या शेतातून पोलिसांनी हस्तगत केला असून सागर लंभाते व हिंदुराव लंभाते या दोघा आरोपींविरुद्ध गुंगीकारक औषध द्रव्य व मनोव्यापारावर परिणाम करणारे पदार्थ अधिनियम १९८५ कलम २० (अ)(ब) अन्वये गुन्हा दाखल केला आहे. अधिक तपास पोलीस उपनिरीक्षक स्वाती धोंगडे करीत आहेत

पोलीस अधिकारी व कर्मचाऱ्यांचे कौतुक

वेषांतर करून गेलेले पोलीस अधिकारी व कर्मचारी यांना या घटनेचा गोपनीयतेने पर्दाफाश करण्यात यश आल्याने त्यांच्या या कामगिरीबद्दल त्यांचे सर्वत्र कौतुक होत आहे.