मंत्री चंद्रकांत पाटील यांच्या निषेधार्थ फलटणमध्ये मोर्चा

एकता दर्शन (फलटण) : भाजप नेते व मंत्री चंद्रकांत पाटील यांनी डॉ. बाबासाहेब आंबेडकर, महात्मा ज्योतिबा फुले, कर्मवीर भाऊराव पाटील या महापुरुषांनी भीक मागुन शाळा चालविल्या असल्याचे वक्तव्य केल्याच्या निषेधार्थ आज फलटण येथे संविधान समर्थन मोर्चा समितीच्या वतीने निषेध मोर्चा काढून येथील प्रशासनास निवेदन देण्यात आले.

औरंगाबाद येथे भाजपचे मंत्री चंद्रकांत पाटील यांनी डॉ. बाबासाहेब आंबेडकर, महात्मा ज्योतिबा फुले, कर्मवीर भाऊराव पाटील या महापुरुषांनी भीक मागुन शाळा चालविल्या असल्याचे वक्तव्य केले होते त्याचे पडसाद राज्यभर उमटले होते. याचाच भाग म्हणून फलटण मध्येही मंत्री पाटील यांच्या वक्तव्याचा निषेध करण्यासाठी संविधान समर्थन मोर्चा समितीच्या वतीने आज येथील प्रांत कार्यालयावर निषेध मोर्चा काढण्यात आला होता.

या मोर्चाच्यावतीने प्रांत अधिकारी डॉ. शिवाजीराव जगताप यांना निवेदन देण्यात आले. यावेळी उपविभागीय पोलीस अधिकारी तानाजी बरडे उपस्थित होते.

मंत्री पाटील यांच्या वक्तव्यामुळे बहुजन समाजाच्या भावना दुखावल्या असून महापुरुषांचा अवमान झाला असल्याचे या निवेदनात नमूद करण्यात आले आहे. चंद्रकांत पाटील यांनी आपल्या पदाचा राजीनामा द्यावा व  यापुढे महापुरुषांचा अवमान करणाऱ्या राज्यकर्त्यांवर कडक कारवाई करणारा कायदा तयार करण्यात यावा अशी मागणी या निवेदनात नमूद करण्यात अली आहे.