२० ग्रामपंचायतींची मतमोजणी आज होणार ; मतमोजणी यंत्रणा सज्ज

एकता दर्शन (फलटण) : दि. १८ रोजी फलटण तालुक्यातील २० ग्रामपंचायतीच्या पंचवार्षिक निवडणुकीसाठी झालेल्या मतदानाची मतमोजणी आज दि. २० रोजी सकाळी १० वाजता येथील शासकीय गोदामात १४ टेबलांवर ७ फेऱ्यांद्वारे होणार असल्याची माहिती निवडणूक निर्णय अधिकारी तथा तहसीलदार समीर यादव यांनी दिली आहे. सर्व निकाल दुपारपर्यंत अपेक्षित असून मतमोजणी परिसरात मोठा पोलीस बंदोबस्त तैनात करण्यात आला आहे.

ग्रामपंचायत निवडणुकीच्या या टप्प्यात एकूण २४ ग्रामपंचायतीच्या निवडणुका जाहिर झाल्या होत्या. नामनिर्देशनपत्र दाखल करण्याच्या अखेरच्या मुदतीपर्यंत २४ पैकी ४ ग्रामपंचायती (मानेवाडी, वेळोशी, झडकबाईचीवाडी, मिरेवाडी कु.) बिनविरोध झाल्या होत्या. उर्वरित २० ग्रामपंचायतींसाठी (बरड, वडले, सोमंथळी, चौधरवाडी, कुरवली खुर्द, ताथवडा, मठाचीवाडी, गिरवी, तरडफ, पिंपरद, विडणी, वाठार निंबाळकर, दुधेबावी, आदर्की बु., आदर्की खुर्द, सुरवडी, पाडेगाव, सालपे, चव्हाणवाडी, कुसूर) दि. १८ रोजी मतदान झाले होते. या २० ग्रामपंचायत निवडणुकीसाठी झालेल्या मतदानाची मतमोजणी आज मंगळवार दि. २० रोजी सकाळी १० वाजता होणार आहे.

या मतमोजणीसाठी शासकीय यंत्रणा सज्ज झाली असून मतमोजणी स्थळावर १४ टेबल लावण्यात आले असून ७ फेऱ्यांद्वारे मतमोजणी केली जाणार आहे. यासाठी १०३ शासकीय अधिकारी व कर्मचाऱ्यांची नेमणूक करण्यात आली आहे. यामध्ये मतमोजणी पर्यवेक्षक, सहाय्यक, राखीव यांच्यासह इतर अधिकारी व कर्मचाऱ्यांचाही समावेश करण्यात आला असून कायदा सुव्यवस्थेचा प्रश्न निर्माण होऊ नये म्हणून मोठा पोलीस फौजफाटा तैनात करण्यात आला आहे.