राज्यातील नगरपालिका निवडणुकांच्या तारखा जाहीर : १८ ऑगस्टला मतदान

फलटण : राज्य निवडणूक आयोगाने राज्यातील ९२ नगरपालिका व ४ नगरपंचायत निवडणुकीच्या तारखांचा बिगुल वाजविला असून सातारा जिल्ह्यातील ५ नगरपालिकांचे मतदान दि. १८ ऑगस्ट रोजी होणार आहे. यात फलटण नगरपालिकेचा समावेश आहे. पालिका निवडणूक कार्यक्रम व तारखांची प्रतिक्षा राज्य निवडणूक आयोगाच्या फतव्याने आता संपली असून अनेक राजकीय पक्षांची निवडणुकीसाठीची धावपळ पहायला मिळणार आहे.

राज्यात १७ जिल्ह्यांमधील पालिकांच्या निवडणूका होणार असून कमी पर्जन्यमान असलेल्या ठिकाणी निवडणुकीचा पहिला टप्पा पार पडणार आहे. यामध्ये सातारा जिल्ह्यातील म्हसवड, रहिमतपूर, फलटण, कराड, आणि वाई या पाच नागरपालिकांचा पहिल्या टप्यात समावेश आहे. जादा पर्जन्यमान ठिकाणच्या पालिका निवडणुका दुसऱ्या टप्यात होणार आहेत. यामध्ये सातारा, पाचगणी, आणि महाबळेश्वर या नगरपालिकांचा समावेश आहे.

२० जुलै रोजी जिल्हाधिकारी निवडणूक कार्यक्रम जाहीर करणार असून २२ ते २८ जुलै दरम्यान नामनिर्देशनपत्र दाखल करायचे आहेत. दाखल केलेल्या नामनिर्देशनपत्रांची छाननी २९ जुलै रोजी होणार आहे. दरम्यान उमेदवारांनी आपले अर्ज माघारी घेण्याची मुदत ४ ऑगस्ट पर्यंत आहे.

पुणे, सातारा, सांगली, सोलापूर, कोल्हापूर, नाशिक, धुळे, नंदुरबार, जळगाव, अहमदनगर, औरंगाबाद, जालना, बीड, उस्मानाबाद, लातूर, अमरावती व बुलढाणा या १७ जिल्ह्यांमध्ये निवडणूक पार पडणार असून निवडणुकांचे निकाल १९ ऑगस्ट रोजी जाहीर करण्यात येणार असल्याचे नमूद निवडणूक आयोगाच्या निवडणूक कार्यक्रमात केले आहे.