फलटण तालुक्यातील रस्त्यांच्या कामासाठी २९ कोटी ५० लाखांचा निधी

एकता दर्शन : फलटण तालुक्यातील विविध रस्त्यांच्या कामासाठी राज्याच्या अर्थसंकल्पात २९ कोटी ५० लाख रुपयांच्या आर्थिक निधीची तरतूद करण्यात आली असल्याची माहिती माढा लोकसभा मतदारसंघाचे खासदार रणजितसिंह नाईक निंबाळकर यांनी दिली आहे.

फलटण-शिंगणापूर-म्हसवड-शेनवडी ते शिंगणापूर घाट संरक्षण भिंत व रस्ता सुधारणासाठी ४ कोटी रुपये, गिरवी नाका ते विंचुर्णी रस्त्यासाठी २ कोटी ५० लाख रुपये, ताथवडा ते मानेवाडी फाटा रस्त्यासाठी ४ कोटी रुपये, दऱ्याचीवाडी ते बोडकेवाडी रस्ता सुधारणासाठी ४ कोटी रुपये, तरडफ-सपकाळ वस्ती ते उपळवे रस्त्यासाठी ३ कोटी रुपये, गिरवी ते मांडवखडक रस्त्यासाठी २ कोटी ५० लाख रुपये, विडणी गावाजवळील कॅनॉलवर नवीन पुलाच्या बांधकामासाठी ५ कोटी रुपये एकूण २५ कोटी रुपयांचा आर्थिक निधी मंजूर झाला असून ३०/५४ योजनेअंतर्गत १२२.१२ लाख, ५०/५४ योजनेअंतर्गत १ कोटी, जनसुविधा अंतर्गत ८७ लाख, नागरी सुविधा अंतर्गत ४५ लाख, 'क' वर्ग तिर्थक्षेत्र योजना अंतर्गत २५ लाख, साकव अंतर्गत ४० लाख असे एकूण २९ कोटी ५० लाख रुपयांची कामे मंजूर करण्यात आली आहेत.

तालुक्यातील विविध गावांना जोडणाऱ्या रस्त्यांची अवस्था दयनीय झाल्याने राज्याचे मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्याकडे सतत पाठपुरावा केल्यामुळे विविध योजनांच्या माध्यमातून विकासकामांसाठी आर्थिक निधी उपलब्ध करून देण्यात आला असल्याने तालुक्यातील प्रत्येक गाव डांबरी रस्त्याने जोडले जाणार असल्याचे खासदार रणजितसिंह नाईक-निंबाळकर यांनी सांगितले आहे.