विकासनिधी वाटपात कोणताही दुजाभाव करणार नाही : मंत्री शंभुराज देसाई

एकता दर्शन, फलटण : राज्याचे मुख्यमंत्री हे सातारा जिल्ह्यातील आहेत आणि मी जिल्ह्याचा पालकमंत्री त्यामुळे जिल्ह्यातील बाळासाहेबांची शिवसेना व भाजप कार्यकर्त्यांच्या आमच्याकडून अपेक्षा असणे स्वाभाविक आहे. कार्यकर्त्यांना बळ देणे, त्यांच्यामागे खंबीरपणे उभे राहणे हे आमचे कर्तव्य असल्याचे सांगत मी जोपर्यंत जिल्ह्याचा पालकमंत्री असेन तोपर्यंत विकास कामांबाबत जिल्ह्यातील सर्व तालुक्यांना समान न्याय देऊन विकासनिधी वाटपात कोणताही दुजाभाव करणार नसल्याची ग्वाही पालकमंत्री शंभुराज देसाई यांनी दिली.

हिंदू हृदयसम्राट स्वर्गीय बाळासाहेब ठाकरे यांच्या जयंती निमित्त बाळासाहेबांची शिवसेना यांच्यावतीने फलटण येथील आयोजित कार्यक्रमात पालकमंत्री बोलत होते.

यावेळी खासदार रणजितसिंह नाईक-निंबाळकर, ज्येष्ठ नेते प्रल्हादराव साळुंखे-पाटील, जिल्हा संपर्क प्रमुख शरद कणसे, जिल्हा प्रमुख चंद्रकांत जाधव, जयवंत शेलार, तालुका संघर्ष समितीचे अध्यक्ष ॲड. नरसिंह निकम, विश्वासराव भोसले, महिला आघाडी जिल्हा प्रमुख शारदाताई जाधव, विरोधी पक्ष नेते समशेरसिंह नाईक-निंबाळकर, धनंजय दादा साळुंखे-पाटील, बजरंग गावडे, सुशांत निंबाळकर, अमोल सस्ते, साखरवाडीचे सरपंच विक्रम भोसले, विराज खराडे, नानासाहेब इवरे, अशोकराव जाधव, विजय मायणे आदी मान्यवरांची प्रमुख उपस्थिती होती.

ग्रामीण रुग्णालयाचा प्रश्न मार्गी लावू :

मंत्री देसाई पुढे म्हणाले, खासदार रणजितसिंह नाईक निंबाळकर यांनी या भागातील विविध प्रश्न उपस्थित केले असून त्यापैकी झिरपवाडी येथील ग्रामीण रुग्णालयाचा विषय आपण अनेक दिवसांपासून ऐकतोय यावर तोडगा काढण्यासाठी संबंधित विभागाचे सर्व अधिकारी यांच्या समवेत बैठक घेऊन ग्रामीण रुग्णालयाचा प्रश्न मार्गी लावू.

फलटणमध्ये अनुशेष राहतोय याचे आश्चर्य : 

आमच्या सरकारने जलसंपदा विभागाच्या १८ प्रकल्पांना मंजुरी दिली आहे. यापूर्वीच्या सरकारला हे काम करता आले नाही त्यामुळे नीरा देवघर विभागातील सर्व प्रलंबित प्रश्न सोडविले जातील. तत्कालीन महाविकास आघाडीच्या काळात जिल्ह्यातील फलटण आणि कराड तालुक्याला मोठ्या प्रमाणात निधी जात होता तरीही फलटणमध्ये अनुशेष राहतोय याचे आश्चर्य वाटत आहे. फलटण शहरातील विकास कामांचा अनुशेष भरून काढला जाईल.

तरुण कार्यकर्त्यांना ताकद देणार : 

हे सरकार आपले आहे. या जिल्ह्यात भाजप सेनेची पाती आहे. त्यामुळे जिल्ह्याला निधी देताना भाजप आणि बाळासाहेबांची शिवसेना मधील कार्यकर्त्यांना विश्वासात घेऊन दोघांनाही विकास निधी दिला जाईल यामध्ये कुठलाही दुजाभाव केला जाणार नाही. ॲड. नरसिंह निकम यांनी उपस्थित केलेले सर्व प्रश्न मार्गी लावले जातील. फलटण येथील बाळासाहेबांची शिवसेना या पक्षाचे कार्यालय तरुण कार्यकर्त्यांनी काढले आहे त्याला ताकद देणे आमचे काम आहे त्यामुळे कार्यकर्त्यांनीही जनतेशी सतत संपर्कात राहावे असा सल्ला यावेळी मंत्री देसाई उपस्थित कार्यकर्त्यांना दिला.

फलटणच्या विकासाचे पालकत्व घ्यावे :

यावेळी खासदार रणजितसिंह म्हणाले, झिरपवाडीतील शासकीय रुग्णालयाची इमारत इथल्या खाजगी हॉस्पिटलला जोडण्याचे राजकारण प्रस्थापितांकडून चालू आहे यात पालकमंत्र्यांनी लक्ष घालावे. आगामी नगरपालिका, जिल्हा परिषद, पंचायत समिती निवडणुका तालुक्यातील भाजप व बाळासाहेबांची शिवसेना खांद्याला खांदा लावून एकत्रित लढणार आहे. फलटण शहरातील अडीच वर्षातील विकासकामांचा अनुशेष भरून काढण्याची जबाबदारी आम्ही तुमच्याकडे पालकमंत्री म्हणून सोपवीत आहोत त्यामुळे आपण फलटणच्या विकासाचे पालकत्व घ्यावे अशी विनंती नव्हे तर नम्र विनंती करत असल्याचे यावेळी खासदारांनी स्पष्ट केले.

दरम्यान, तालुका संघर्ष समितीचे अध्यक्ष ॲड. नरसिंह निकम यांनी विविध प्रश्न उपस्थित करुन पालकमंत्रांचे लक्ष वेधले.

प्रारंभी पालकमंत्री व खासदार यांनी बाळासाहेबांची शिवसेना संपर्क कार्यालयाचे उद्घाटन केले. यानंतर पालकमंत्री देसाई यांचा नागरी सत्कार करण्यात आला. उपस्थित मान्यवरांचे स्वागत सचिन बिडवे, विजय मायने व नानासाहेब इवरे यांनी केले. प्रास्ताविक विराज खराडे व आभार विजय मायने यांनी मानले. 

कार्यक्रमास भाजप व बाळासाहेबांची शिवसेना पदाधिकारी मोठ्या संख्येने उपस्थित होते.