लायन्स क्लब ऑफ फलटण गोल्डनचा पदग्रहण सोहळा उत्साहात संपन्न

फलटण : लायन्स क्लब ऑफ फलटण गोल्डनच्या नुतन पदाधिकाऱ्यांचा पदग्रहण सोहळा येथील लक्ष्मीनगर मधील गौरीशंकर बंगला या ठिकाणी मोठ्या उत्साहात संपन्न झाला.

२०२२-२३ या वर्षासाठी लायन्स क्लबच्या अध्यक्षपदी म्हणून सौ. सुनंदा भोसले यांची यावेळी निवड करण्यात आली. सौ. सुनंदा भोसले यांनी सौ. सुनीता कदम, सौ. सुजाता सोनुलकर, सौ. नीलम देशमुख, व सौ. दिपाली निंबाळकर यांच्याकडून आपल्या अध्यक्षपदाचा पदभार स्वीकारला. यावेळी भोजराज नाईक निंबाळकर यांनी क्लबच्या नवीन १२ सदस्यांना शपथ दिली व पुष्पगुच्छ देऊन त्यांचे स्वागत केले.

दरम्यान, २०२१-२२ या वर्षातील कार्याचा आढावा मांडताना सौ. सुनीता कदम, सौ. नीलम देशमुख, व सौ. पूनम कदम यांनी आगामी काळात सुमारे २ लाख लोकांपर्यंत पोहोचण्याचे उद्दिष्ट असल्याचे सांगून सन २०२१-२२ या वर्षाच्या कार्यकाळात सामाजिक उपक्रम राबवत असताना अनेक वैद्यकीय शिबिरं, वृक्षारोपण, बालक-पालक मेळावे, नवीन उद्योजकांना मार्गदर्शन, मधुमेह जनजागृती इत्यादी कार्यक्रम यशस्वी केल्याचे सांगितले.

प्रारंभी मान्यवरांच्या हस्ते दीप प्रज्वलन करून मेल्वीन जोन्स फेलो यांच्या प्रतिमेस पुष्पहार अर्पण करण्यात आला. लायन्स क्लबच्या अध्यक्षा सौ. सुनीता कदम यांनी घंटानाद केला. ध्वजवंदन सौ. सुजाता सोनवलकर यांनी केले. सौ. नीलम देशमुख, सौ. पूनम कदम, व सौ. वैशाली कांबळे यांनी स्वागत गीत सादर केले.

कार्यक्रमाचे प्रास्ताविक करताना सौ. उज्ज्वला निंबाळकर यांनी लायन्स क्लब या आंतरराष्ट्रीय संघटनेचे कार्य व महत्व, शाखेची स्थापना आदी विषयांची सविस्तर माहिती दिली. जगदीश पुरोहित यांनी नव निर्वाचित पदाधिकाऱ्यांना प्रोजेक्टरवर प्रात्यक्षिकं दाखवत त्यांच्या कर्तव्यांची जाणीव करून देत खेळीमेळीच्या वातावरणात शपथविधी संपन्न केला. सौ. सुजाता सोनवलकर यांनी उपस्थितांचे आभार मानले.