माऊलींच्या पालखी सोहळ्यात भक्तीचा महापूर : टी एन जगताप

फलटण : आळंदी ते पंढरपूर मार्गावरील पालखी सोहळा भाविकांच्या भक्तीचा महापूर असून आषाढी वारीचा सांस्कृतिक ठेवा आहे. भागवत धर्माची भगवी पताका पंढरीच्या दिशेने ऊन-पावसाची तमा न करता वेगाने धावते आहे. राज्याच्या प्रत्येक भागातील माणसं पांडुरंगाचे सत्व जाणून वारीत विठ्ठलनामाचा जयघोष करताना दिसत असून पालखी सोहळा भाविकांच्या भक्तीचा महापूर असल्याचे मत ज्येष्ठ संत साहित्यिक तानाजी जगताप यांनी व्यक्त केले आहे.

टाळ, मृदुंगाचा गजर व हरिनामाचा जयघोष करीत महाराष्ट्राच्या इतर भागासह मराठवाडा भागातील वारकरी या वारीत मोठ्या प्रमाणात सहभागी होत असतात. वारीत विविध जाती, धर्म, आणि पंथाचे लोक सहभागी होतात. वारीकडे निधर्मी वारी म्हणून पाहिले जाते. वारी माणुसकीचे विपुल जग आहे. पालखी वारी समाजाला समतेचा आधार आणि आदर्श देत आहे. समस्त समाज भजन, किर्तन, भारूड यांच्या प्रबोधनातून घडतो आहे, असेही तानाजी जगताप यांनी सांगितले.

पंढरीच्या वारीचे स्वरूप आज बदलत असून समाजातील मानवी घटक वारीत सहभागी होताना दिसतात. संताचा विचार अवगत करतात, आणि अवगत विचारांचा प्रचार व प्रसार करतात. ज्ञानेश्वरी मधील भक्ती आणि ज्ञानमार्ग मानवतेचा विकास करेल. समाजाने अनेक क्रांत्या पाहिल्या परंतु संत विचार आजही माणसांना जोडण्यासाठी उपयुक्त ठरत असून त्याचे प्रमुख कारण वारीतील सहवास क प्रबोधन हे आहे, असे जगताप यांनी सांगितले.