फलटणमध्ये आजपासून यशवंतराव चव्हाण मराठी साहित्य संमेलन

एकता दर्शन (फलटण) : महाराष्ट्राचे शिल्पकार स्व.यशवंतराव चव्हाण यांच्या स्मृतीप्रीत्यर्थ दोन दिवसीय १० वे ‘यशवंतराव चव्हाण मराठी साहित्य संमेलन’ आज दि. २५ पासून सुरु होत आहे. गेली अनेक वर्षे महाराष्ट्र साहित्य परिषद फलटण शाखेच्यावतीने फलटण मध्ये ‘यशवंतराव चव्हाण मराठी साहित्य संमेलन’ हा उपक्रम आयोजित करण्यात येत असतो. हा उपक्रम यावर्षी श्रीराम एज्युकेशन सोसायटी व श्री सद्गुरू प्रतिष्ठान यांच्या सहकार्याने होत असून दोन दिवस चालणारे हे साहित्य संमेलन सौ. वेणूताई चव्हाण साहित्य नगरीमध्ये संपन्न होणार आहे.

आज दि. २५ नोव्हेंबर रोजी सकाळी ९ वाजता फलटण शहरातील विविध शाळांमधील विद्यार्थ्यांच्या उपस्थितीत ग्रंथदिंडीचा शुभारंभ होणार आहे. फलटण एज्युकेशन सोसायटीचे सेक्रेटरी श्रीमंत संजीवराजे नाईक निंबाळकर, खासदार रणजितसिंह नाईक निंबाळकर यांच्या हस्ते व श्रीराम एज्युकेशन सोसायटीचे अध्यक्ष सुभाषराव सूर्यवंशी-बेडके, ज्येष्ठ नेते सुभाषराव शिंदे, सह्याद्रीभैया कदम, अ‍ॅड.सौ.मधुबाला भोसले यांच्या प्रमुख उपस्थितीमध्ये ग्रंथदिंडीचा शुभारंभ होणार असून या ग्रंथदिंडीची सुरुवात श्रीमंत मालोजीराजे नाईक निंबाळकर यांच्या पुतळ्यापासून होणार आहे.

यानंतर सकाळी १०:३० वाजता संमेलनाचे उद्घाटन माजी आमदार उल्हासदादा पवार यांच्या हस्ते होणार असून संमेलनाचे अध्यक्षस्थान किशोर बेडकिहाळ भूषविणार आहेत. दरम्यान, ग्रंथप्रदर्शनाचा शुभारंभ प्रसिद्ध वक्ते व महाराष्ट्र प्रदेश काँग्रेसचे नेते सत्यजित तांबे व राज्य शासनाच्या माहिती व जनसंपर्क विभागाचे पुणे विभागीय उपसंचालक डॉ.राजू पाटोदकर यांच्या हस्ते होणार आहे. याप्रसंगी आमदार दीपक चव्हाण, राज्य साहित्य व संस्कृती मंडळाच्या सचिव मीनाक्षी पाटील, प्रकाश पायगुडे, विनोद कुलकर्णी, डॉ. सोपानराव चव्हाण, सौ.सुनिताराजे पवार, प्रमोद आडकर, उद्धव कानडे, राज्य साहित्य आणि संस्कृती मंडळाचे सदस्य रविंद्र बेडकिहाळ, प्रदीप पाटील विशेष अतिथी म्हणून उपस्थित राहणार आहेत.

दरम्यान, जिल्ह्यातील महाविद्यालयांचे नियतकालिक, उत्कृष्ट दिवाळी अंक, उत्कृष्ट लेखक व कवि यांचा सन्मान, कोल्हापूर विभागातील प्रमुख साहित्य संस्थांचा सन्मान करण्यात येणार असून ‘यशवंतराव चव्हाण सहकार गौरव पुरस्कारा’चे वितरणही या कार्यक्रमात करण्यात येणार आहे.

उद्घाटन समारंभानंतर दुपारी ४ ते ५:३० या वेळेमध्ये ‘पत्रकारांचे मराठी साहित्यातील योगदान’ या विषयावर परिसंवाद आयोजित केला असून या परिसंवादाचे अध्यक्षस्थान प्रसिद्ध विचारवंत व अभ्यासक डॉ.अशोक चौसाळकर भूषविणार आहेत. या परिसंवादामध्ये दैनिक पुण्यनगरीचे सातारा जिल्हाआवृत्ती प्रमुख विनोद कुलकर्णी व पुणे दैनिक लोकमतचे संपादक संजय आवटे सहभागी होणार आहेत.

संमेलनाचा दुसरा दिवस :

दि. २६ नोव्हेंबर रोजी सकाळी ११ वाजता पद्मश्री लक्ष्मण माने यांची ‘यशवंतराव चव्हाण आणि माझी जडणघडण’ या विषयावर प्रकट मुलाखत, दुपारी १२ वाजता भारतीय स्वातंत्र्याच्या अमृतमहोत्सवीवर्षानिमित्त ज्येष्ठ कवी व साहित्यिक विसुभाऊ बापट यांचा ‘७५ वर्षांतील मराठी कवितांची वैभवशाली वाटचाल’ हा कार्यक्रम प्रसिद्ध कवी उद्धव कानडे यांच्या अध्यक्षतेखाली होणार आहे.

दुपारी २:३० वाजता संमेलनाचा समारोप महाराष्ट्र विधानपरिषदेचे माजी सभापती व आमदार श्रीमंत रामराजे नाईक निंबाळकर यांच्या प्रमुख उपस्थितीमध्ये होणार आहे यावेळी प्रसिद्ध वक्ते व लेखक मधुकर भावे यांचे ‘यशवंतराव चव्हाण व आजचा महाराष्ट्र’ या विषयावर विशेष व्याख्यान होणार आहे. याप्रसंगी मधुकर भावे यांना यावर्षीचा ‘यशवंतराव चव्हाण साहित्य गौरव पुरस्कार श्रीमंत रामराजे नाईक निंबाळकर यांच्या हस्ते देण्यात येणार आहे यावेळी भारती विद्यापीठाचे कार्यवाह व माजी राज्यमंत्री आमदार डॉ.विश्‍वजीत कदम यांची प्रमुख उपस्थिती असणार आहे. संमेलनाच्या पार्श्वभूमीवर आयोजित करण्यात आलेल्या राज्यस्तरीय खुल्या निबंध स्पर्धेचा पारितोषिक वितरण समारंभ यावेळी संपन्न होणार आहे.

या संमेलनाला साहित्य प्रेमींनी व नागरिकांनी मोठ्या संख्येने उपस्थित रहावे असे आवाहन संमेलन स्वागत अध्यक्ष दिलीपसिंह भोसले, कार्याध्यक्ष डॉ. सचिन सूर्यवंशी-बेडके, राज्य साहित्य आणि संस्कृती मंडळाचे सदस्य रविंद्र बेडकिहाळ, राज्य साहित्य परिषद फलटण शाखेचे अध्यक्ष सेवानिवृत्त प्राचार्य शांताराम आवटे यांनी केले आहे.