श्रीमंत रामराजेंचा अमृतमहोत्सवी वाढदिवस सत्कार सोहळा

एकता दर्शन, फलटण : महाराष्ट्र राज्य विधान परिषदेचे माजी सभापती आमदार श्रीमंत रामराजे नाईक निंबाळकर यांच्या अमृत महोत्सवी वाढदिवसानिमित्त विविध कार्यक्रमांचे आयोजन करण्यात आले असून श्रीमंत रामराजे यांचा भव्य सत्कार सोहळा आज होणार आहे.

दिनांक ९ मे रोजी सायंकाळी ५ वाजता मुधोजी क्लब मैदान येथे महाराष्ट्र विधानसभा विरोधी पक्ष नेते अजित पवार यांच्या हस्ते श्रीमंत रामराजे यांचा सत्कार होणार आहे. या सत्कार समारंभाचे अध्यक्षस्थान राष्ट्रवादी काँग्रेसचे प्रदेशाध्यक्ष आमदार जयंत पाटील भूषविणार असून सातारा जिल्ह्याचे पालकमंत्री नामदार शंभूराज देसाई प्रमुख पाहुणे म्हणून उपस्थित राहणार आहेत.

याप्रसंगी खासदार श्रीनिवास पाटील, माजी बांधकाम मंत्री विक्रमसिंह पाटणकर, आमदार श्रीमंत छ.शिवेंद्रसिंहराजे भोसले, आमदार बाळासाहेब पाटील, आमदार मकरंद पाटील, आमदार शशिकांत शिंदे, माजी आमदार प्रभाकर घार्गे, आमदार दीपक चव्हाण, निवृत्त सनदी अधिकारी प्रभाकर देशमुख, श्रीमंत संजीवराजे नाईक निंबाळकर, श्रीमंत रघुनाथराजे नाईक निंबाळकर, श्रीमंत शिवरूपराजे खर्डेकर, श्रीमंत बंटीराजे खर्डेकर, सुभाषराव शिंदे, डॉ.विजयराव बोरावके, सुभाषराव बेडके, दिलीपसिंह भोसले आदी मान्यवर उपस्थित राहणार आहेत.

दरम्यान तालुक्यातील ७५ मंदिरांमध्ये कृष्णेच्या पाण्याने जल अभिषेक व पूजा असा विधिवत कार्यक्रम होणार आहे.

आज होणाऱ्या सत्कार सोहळ्यात श्रीमंत रामराजे नाईक निंबाळकर यांना चांदीच्या अमृत कुंभामध्ये कृष्णेचे पवित्र जल देऊन त्यांचा सत्कार करण्यात येणार आहे. दुपारी ३ वाजता शंकर मार्केट येथून अमृतकुंभ मिरवणुकीने सत्कार सोहळा स्थानी नेण्यात येणार आहे. दुपारी ४ वाजता मुधोजी क्लब मैदानावर कृष्णेच्या पाण्याने रामराजे यांची ग्रंथ व जल तुला करण्यात येणार आहे. यानंतर अजितदादा यांचे हस्ते त्यांचा यथोचित सत्कार करण्यात येणार आहे.

या सत्कार सोहळ्यास सातारा जिल्ह्यातील श्रीमंत रामराजे प्रेमी नागरिकांनी उपस्थित रहावे असे आवाहन श्रीमंत रामराजे नाईक निंबाळकर अमृत महोत्सव वाढदिवस सोहळा समितीच्यावतीने करण्यात आले आहे.