फलटण महसूल विभागातील अव्वल कारकून लाचलुचपत विभागाच्या जाळ्यात

एकता दर्शन (फलटण) : येथील महसुल विभागाच्या रेकॉर्ड कार्यालयातील अव्वल कारकुन व त्याचा एक खाजगी साथीदार अशा दोघांना लाचलुचपत प्रतिबंधक विभागाच्या पथकाने दोन हजार रुपयांची लाच घेताना रंगेहात पकडुन त्यांच्या विरूध्द येथील फलटण शहर पोलीस ठाण्यात गुन्हा दाखल करण्यात आला आहे.

याबाबत सविस्तर माहिती अशी कि, अलगुडेवाडी (ता. फलटण) येथील तक्रारदाराने आपल्या घराकडे जाणारा कच्चा रस्ता पक्का मिळण्यासाठी आवश्यक कागदपत्रांची मागणी रेकॉर्ड कार्यलयातील अव्वल कारकुन पी.एन. जाधव (रा. फलटण) यांच्याकडे केली होती. दरम्यान जाधव यांनी ग्रामपंचायतदप्तरी नोंद करून तक्रार नसल्याचे प्रतिज्ञापत्र करून देण्यासाठी तक्रारदाराकडे २ हजार रुपयांची मागणी केली होती, त्यावेळी तक्रारदाराने जाधव यांच्या मागणीची तक्रार सातारा येथील लाचलुचपत प्रतिबंधक विभागाकडे केली होती.

त्यानुसार, दि. २० रोजी लाचलुचपत प्रतिबंधक विभाग पुणे पोलीस अधीक्षक राजेश बनसोडे, पोलीस अधीक्षक सुरज गुरव, अधिकारी सुजय घाडगे यांच्या मार्गदर्शनाखाली सातारा येथील लाचलुचपत प्रतिबंधक विभागाचे पोलीस निरीक्षक सचिन राऊत, विक्रम पवार, विनोद राजे, संभाजी काटकर यांच्या पथकाने पांडुरंग नामदेव जाधव व त्याचा खाजगी साथीदार सपकाळ या दोघांना दोन हजार रूपये घेताना रंगेहात पकडले. याप्रकरणी जाधव व सपकाळ यांच्या विरुद्ध येथील शहर पोलीस ठाण्यात गुन्हा दाखल झाला आहे.