कृषी उत्पन्न बाजार समितीच्या १८ जागांसाठी १२१ उमेदवारी अर्ज दाखल

एकता दर्शन : फलटण कृषी उत्पन्न बाजार समिती संचालक पदाच्या १८ जागांसाठी उमेदवारी अर्ज दाखल करण्याच्या अखेरच्यादिवशी १२१ उमेदवारांनी अर्ज दाखल केले असून दिनांक ५ एप्रिल रोजी दाखल उमेदवारी अर्जांची छाननी निवडणूक निर्णय अधिकारी यांच्या कार्यालयात होणार आहे.

सोसायटी मतदारसंघातील ११ जागांसाठी ८१ उमेदवारी अर्ज दाखल झाले असून यामध्ये सर्वसाधारण ७ जागांसाठी ५२ उमेदवारी अर्ज, महिला राखीव २ जागांसाठी ९ उमेदवारी अर्ज, इतर मागास प्रवर्ग १ जागेसाठी ६ उमेदवारी अर्ज, भटक्या विमुक्त जाती जमाती १ जागेसाठी १४ उमेदवारी अर्ज दाखल झाले आहेत. ग्रामपंचायत मतदारसंघातील ४ जागांसाठी ३५ उमेदवारी अर्ज दाखल झाले असून यामध्ये सर्वसाधारण २ जागांसाठी २६ उमेदवारी अर्ज, अनुसूचित जाती जमाती १ जागेसाठी २ उमेदवारी अर्ज, आर्थिक दुर्बल घटक १ जागेसाठी ७ उमेदवारी अर्ज दाखल झाले आहेत.

व्यापारी अडते मतदारसंघातील २ जागांसाठी ४ उमेदवारी अर्ज दाखल झाले आहेत. हमाल मापाडी मतदारसंघातील एका जागेसाठी एकच उमेदवारी अर्ज दाखल झाला असल्याने त्या उमेदवाराची बिनविरोध निवड होणार आहे.

दिनांक ६ एप्रिल ते २० एप्रिल दरम्यान सकाळी ११ ते दुपारी ३ या कालावधीत उमेदवारी अर्ज माघारी घेता येणार आहेत. २१ एप्रिल रोजी निवडणूक निर्णय अधिकारी कार्यालयात निवडणूक लढविणाऱ्या उमेदवारांची अंतिम यादी प्रसिद्ध व निवडणूक चिन्ह वाटप केले जाणार आहे. ३० एप्रिल रोजी सकाळी ७ ते दुपारी ४ वाजेपर्यंत मतदान होईल व त्याचदिवशी मतमोजणीनंतर निकाल जाहिर केला जाणार आहे.