फलटणकरांकडून वारकऱ्यांची मनोभावे सेवा

फलटण : श्री संतश्रेष्ठ ज्ञानेश्वर माऊलींचा पालखी सोहळा फलटणनगरीत दोन दिवसाच्या मुक्कामासाठी आल्यानंतर येथील विस्तीर्ण अशा विमानतळावरील पालखीतळावर विसावल्यानंतर सोहळ्यातील लाखो वारकऱ्यांच्या मदतीसाठी अवघ्या शहरवासीयांनी त्यांची मनोभावे सेवा करीत असल्याचे चित्र ठिकठिकाणी दिसत होते.

श्री संतश्रेष्ठ ज्ञानेश्वर माऊलींचा पालखी सोहळा फलटणनगरीत दोन दिवसाच्या मुक्कामासाठी आल्यानंतर येथील विस्तीर्ण अशा विमानतळावरील पालखीतळावर विसावल्यानंतर सोहळ्यातील लाखो वारकऱ्यांच्या मदतीसाठी अवघ्या शहरवासीयांनी त्यांची मनोभावे सेवा करीत असल्याचे चित्र ठिकठिकाणी दिसत होते. पालखी सोहळ्याचे फलटणकरांनी स्वागत केल्यानंतर सलग दोन दिवस शहरात चहा-पाणी, नाष्टा, जेवन भाविकांना कमी पडू दिले नाही. शहरातील ठिकठिकाणी अनेकांनी अन्नछत्र उपलब्ध केल्याचे चित्र होते. या सर्व सोयी व सुविधांचा आस्वाद अनेक वारकरी मनापासून घेत होते.

शहरात विठ्ठलाच्या नामाचा जयघोष टाळ मृदंग गजर, भजन, कीर्तन प्रबोधन असे विविध अध्यात्मिक कार्यक्रम सर्वत्र ठिकाणी सुरू असल्यामुळे अवघे शहर दुमदुमुन निघाले होते. शहरातील सार्वजनिक ठिकाणं, शाळा, महाविद्यालय, प्रत्येक चौक आणि कॉलनीत वारकऱ्यांना निवाऱ्यांची सोय उपलब्ध करून देण्यात आली होती. जिकडे पहावे तिकडे वारकऱ्यांची गर्दीच गर्दी होती. शहरातील प्रत्येक चौकात जेवणासाठी वारकऱ्यांच्या मोठ्या पंक्ती दिसून येत होत्या. शहरातील प्रत्येक माणूस वारकऱ्यांची काळजी घेताना दिसत होता.

कोरोना महामारीमुळे गेली दोन वर्ष पालखी सोहळा पहायला मिळाला नसल्याने यावेळी अवघ्या तालुक्यात चैतन्य निर्माण झाले होते. वारकऱ्यांची सेवा करण्याची संधी पालखी सोहळ्याच्या माध्यमातून उपलब्ध झाल्याने सेवा देण्याच्या स्पर्धा सर्वत्र सुरू झाल्याचे दिसत होते.

आरोग्य शिबिरे आणि सुविधा, जनसेवा हिच खरी ईश्वर सेवा या भावनेतून खासदार रणजितसिंह नाईक-निंबाळकर यांच्या मार्गदर्शनाखाली फलटण तालुका भारतीय जनता पार्टीच्यावतीने पालखी सोहळ्यातील वारकऱ्यांसाठी मोफत आरोग्य शिबिराचे आयोजन केल होते. शिबिराचे उद्घाटन सातारा जिल्हा परिषदेच्या सदस्या ॲड. सौ. जिजामाला नाईक-निंबाळकर यांच्या हस्ते झाले. याप्रसंगी शहर व तालका भाजपा पदाधिकारी उपस्थित होते.

याबरोबरच माऊली फाउंडेशन, लोकमान्य नर्सिंग होम, मॅग फाउंडेशन, जनसेवा पॅथॉलॉजी, निकोप हॉस्पीटल यासह अन्य ठिकाणी वारकऱ्यांना आरोग्य सुविधा पुरविण्यात आल्या. विविध गणेश मंडळे, स्वयंसेवी संस्था यांनीही पालखी सोहळ्यातील भाविकांना सर्व सोयी सुविधा निर्माण करून दिल्या.