धोम-बलकवडी प्रकल्पग्रस्तांचे दि.१६ रोजी आमरण उपोषण

एकता दर्शन : धोम-बलकवडी प्रकल्पग्रस्तांच्या विविध प्रलंबित मागण्यांसाठी 'धोम-बलकवडी धरणग्रस्त' संघटनेच्यावतीने गुरुवार, दि.१६ रोजी फलटण तालुक्यातील पुनर्वसित गोळेवाडी, ठाकुरकी येथे आमरण उपोषण करण्यात येणार असल्याची माहिती संघटनेचे अध्यक्ष संपत कळंबे यांनी एका प्रसिद्धी पत्रकाद्वारे दिली आहे.

धोम-बलकवडी प्रकल्प पूर्ण होऊन २५ वर्ष झाली असून तो पूर्ण करण्यासाठी प्रकल्पग्रस्तांनी समर्थण दिले असल्यानेच हा प्रकल्प पूर्ण झाला. परिणामी फलटण व खंडाळा तालुक्यात हरित क्रांती झाली, या भागातील शेतकऱ्यांच्या शेतीतील उत्पन्न वाढले, आर्थिक क्षमता वाढली मात्र ज्यांच्यामुळे हि परिस्थिती निर्माण झाली त्या प्रकल्पग्रस्तांचे विविध प्रश्न अद्यापही अनुत्तरीत असून त्याचा विचार कोणीही करत नसल्याचा आरोप प्रसिद्धी पत्रकाद्वारे करण्यात आला आहे.

संबंधित मागण्यांचा पाठपुरावा करताना अर्जासह अनेकांच्या भेटी घेत विनंती व चर्चा केल्या मात्र त्यातूनही काही निष्पन्न झाले नाही त्यामुळे पुन्हा एकदा आंदोलन व उपोषण याशिवाय पर्याय नसल्याने तालुक्यातील धोम-बलकवडी प्रकल्पग्रस्त गावातील प्रमुख ग्रामस्थांच्या उपस्थितीत आमरण उपोषण केले जाणार आहे.

पुनर्वसित गावांना महसुली दर्जा देणे, पुनर्वसित गावठाणातील सातबारा वरील मूळ स्थानिकांचे नाव कमी करून संबंधित पुनर्वसीत गावाचे नाव दाखल करण्यात यावे, प्रकल्पग्रस्तांना वाटप झालेल्या जमिनीचे नकाशे फेर करून कबजेपट्टीसह मिळावेत, सातबारा खाते निहाय विभक्त करून मिळावा, दळणवळणसाठीचे रस्ते करण्यात यावेत, वहिवाटीचे अडथळे दूर व्हावेत, वाटप जमीन प्रकरणात मूळ मालक यांच्याकडून शासनाकडे दाखल प्रकरणासाठी प्रकल्पग्रस्त खातेदारांना प्रतिवादी न करता शासन यंत्रणेला करावे अशा विविध १९ मागण्या प्रसिद्धी पत्रकात नमूद केल्या आहेत.