श्रीमंत संजीवराजेंची पालखीतळ स्वच्छता मोहीम फत्ते

एकता दर्शन: संतश्रेष्ठ ज्ञानेश्वर माऊली पालखी सोहळ्याच्या फलटण येथील मुक्कामानंतर जिल्हा परिषदेचे माजी अध्यक्ष श्रीमंत संजीवराजे नाईक-निंबाळकर यांच्या प्रमुख उपस्थितीत पालखीतळ स्वच्छता मोहीम राबविण्यात आली. यामध्ये शहरातील विविध संस्था सहभागी झाल्या होत्या. स्वच्छतेच्या कामासाठी अनेकांचे हात पुढे आल्याने काही वेळातच पालखी तळ चकाचक झाल्याचे चित्र दिसत होते.

फलटण येथील पालखी तळ व परिसर स्वच्छतेचे काम प्रतिवर्षी करण्यात येत असते. श्रीमंत संजीवराजे यांच्या पुढाकाराने स्वच्छता परंपरा राखण्यात फलटणकर नेहमीच कार्यरत असतात. यावर्षीही पालखी तळ स्वच्छ करण्याची परंपरा फलटणमधील सेवाभावी संस्थांनी प्रत्यक्ष कृतीद्वारे कायम राखली आहे.

फलटण एज्युकेशन सोसायटीचे मुधोजी महाविद्यालय, मुधोजी हायस्कूल, शेती शाळा, ब्रिलियंट इंग्लिश स्कूल मधील विद्यार्थी, शिक्षक, शिक्षकेतर कर्मचारी, फलटण नगरपालिका मधील अधिकारी कर्मचारी, आजी माजी सदस्य, सहकारी संस्थाचे पदाधिकारी यांचे सह विविध स्वंयसेवी संस्थाचे पदाधिकारी यांनी श्रीमंत संजीवराजे नाईक-निंबाळकर यांच्या स्वच्छता मोहिमेच्या आवाहनास प्रतिसाद देत प्रत्यक्ष सक्रिय होवुन स्वच्छता मोहिम फत्ते केली.