फलटण बंदच्या आवाहनास शहरवासीयांचा उत्स्फूर्त प्रतिसाद

एकता दर्शन: मराठा आरक्षण आंदोलनाच्या पार्श्वभूमीवर फलटण मराठा क्रांती मोर्चा व सकल मराठा समाज बांधव यांच्यावतीने पुकारण्यात आलेल्या फलटण बंदला शहरवासीयांनी उत्स्फूर्त प्रतिसाद देत १०० टक्के बंद पाळला.

फलटण शहरातील धान्य, भाजीपाला व फळविक्रेते, किराणा व कापड दुकानदार, छोटे-मोठे व्यापारी यांनी फलटण बंदच्या आवाहनास प्रतिसाद देऊन आपापली दुकाने बंद ठेवली होती. नाना पाटील चौक, छत्रपती शिवाजी महाराज चौक, डॉ.बाबासाहेब आंबेडकर चौक, स्व.अशोकराव आबाजी भोईटे चौक, महात्मा फुले चौक, गिरवी नाका, गजानन चौक, पाचबत्ती चौक, मलठण, बारामती चौक, रविवार पेठ, पृथ्वी चौक, डीएड चौक या ठिकाणची सर्व दुकाने बंद ठेवण्यात आल्याचे चित्र होते.

मराठा क्रांती मोर्चाच्यावतीने आयोजित केलेली मोटरसायकल रॅली व मूक मोर्चा रद्द करण्यात आला होता. फलटण बसस्थानकामधील एसटी सेवा बंद होती. एकूणच अत्यावश्यक सेवा वगळता या बंदला फलटणवासीयांनी मराठा क्रांती मोर्चा व सकल मराठा बांधवांच्या आवाहनाला प्रतिसाद देत १०० टक्के बंद पाळला.

मनोज जरांगे पाटील यांच्या अमरण उपोषणास पाठिंबा म्हणून फलटण येथील मराठा क्रांती मोर्चा व मराठा समाज बांधवांच्यावतीने तहसील कार्यालयाच्यासमोर गेली ७ दिवस साखळी उपोषण सुरू आहे. मागील ३ दिवसांपासून अमरण उपोषणही सुरू करण्यात आले असून अमरण उपोषणाचा आजचा चौथा दिवस आहे.