माढ्याच्या विकासासाठी सरकार खासदारांच्या पाठीशी : देवेंद्र फडणवीस

एकता दर्शन : माढा लोकसभा मतदारसंघातील विकासकामे खासदार रणजितसिंह यांच्या कार्यकाळात पूर्वीपेक्षा जास्त झाली असून आगामी काळातही या मतदारसंघातील विकासकामे पूर्ण क्षमतेने केली जाणार असल्याचे सांगत माढा लोकसभा मतदारसंघातील कामासाठी आमचे सरकार खासदार रणजितसिंह यांच्या पाठीमागे खंबीरपणे उभे राहणार असल्याची ग्वाही उपमुख्यमंत्री देवेंद्र फडणवीस यांनी दिली.

फलटण शहर व ग्रामीण पोलीस ठाणे, वाठार पोलीस ठाणे व वसाहत या नूतन इमारत बांधकामांचे ऑनलाईन उद्घाटन बरड (ता.फलटण) येथे करण्यात आले याप्रसंगी आयोजित कार्यक्रमात ते बोलत होते. यावेळी खासदार रणजितसिंह नाईक-निंबाळकर, पालकमंत्री शंभूराज देसाई, खासदार श्रीमंत छ.उदयनराजे भोसले, आ.प्रवीण दरेकर, आ.जयकुमार गोरे, आ.शिवेंद्रराजे भोसले आदी प्रमुख मान्यवर उपस्थित होते.

पोलीस अधिकारी व कर्मचारी यांना घरे बांधून दिली पाहिजेत हि शासनाची भूमिका असल्याने गृहप्रकल्प कामांना शासन प्राधान्य देत आहे. माढ्यात जे झाले नाही ते आम्ही केले. यासाठी खासदार निंबाळकर यांचा आमच्याकडे सतत पाठपुरावा असतो. त्यांच्या सततच्या पाठपुराव्यामुळे कामे होत आहेत. या पुढेही जिल्ह्यातील रस्ते, सिंचन प्रकल्प, रेल्वे यासह अन्य विकास योजनांना आवश्यक निधी शासन देणार असल्याचे उपमुख्यमंत्री फडणवीस यांनी यावेळी सांगितले.

उपमुख्यमंत्री म्हणाले, वारकऱ्यांसाठी विमा योजना आणून आम्ही उत्तरदायित्व निभावले आहे. सामान्य माणूस केंद्रबिंदू मानून सरकार काम करीत आहे. फलटण शहर, ग्रामीण आणि वाठार स्टेशन पोलीस ठाणे व वसाहतीसाठी सरकारने १३ कोटी ६४ लाखांचा निधी उपलब्ध करुन दिला आहे. अंतर्गत डांबरी रस्ते, संरक्षक भिंत, भूमिगत पाण्याच्या टाक्या, रेन वॉटर हार्वेस्टिंग , पथदिवे, अंतर्गत व बाह्य सोलर प्रणाली, जनरेटर सेट, सेफ्टी टॅंक, अग्निशमन प्रणाली, ट्रॉन्सफॉर्मर, परिषद हॉल, मिटींग हॉल, आदी सुविधांचा समावेश पोलीस ठाणे व वसाहत प्रकल्पामध्ये केला जाणार आहे.

खासदार रणजितसिंह म्हणाले, आपण निवडणूक काळात मतदारांना जे शब्द दिले होते, त्या सर्व कामांची पूर्तता उपमुख्यमंत्री देवेंद्र फडणवीस यांनी केली असल्याने माढा लोकसभा मतदारसंघातील विकासाचे खरे शिल्पकार देवेंद्र फडणवीस साहेब असल्याचे सांगत धोम बलकवडी, नीरा देवघर या धरणांची प्रलंबित कालव्यांची कामे, फलटण-पंढरपूर रेल्वे मार्ग, विविध रस्ते व विकासकामे करण्यासाठी केंद्र व विद्यमान राज्य सरकारने भरीव सहकार्य केले आहे. आगामी काळातही आपण विकासकामांसाठी कमी पडणार नसल्याची ग्वाही खासदार रणजितसिंह यांनी यावेळी दिली.

पालकमंत्री शंभूराज देसाई म्हणाले, पोलीस अधिकारी व कर्मचारी यांना सर्व सोयी सुविधा निर्माण करून दिल्यास त्यांच्याकडून चांगले काम होते. जिल्ह्यात पोलीस विभागामार्फत महिला सुरक्षाबाबत चांगला उपक्रम राबविण्यात आला आहे. जिल्ह्यातील ढेबेवाडी, औंध, मसूर यासह अन्य १३ गृहनिर्माण प्रकल्प प्रलंबीत आहेत. गृह विभागाने निधी उपलब्ध करून सदरचे प्रकल्प मंजूर केले पाहिजेत.

प्रारंभी उपमुख्यमंत्री देवेंद्र फडणवीस व अन्य मान्यवरांच्या हस्ते पोलीस ठाण्यांच्या नूतन इमारतींचे ऑनलाईन उद्घाटन करण्यात आले. दरम्यान पोलीस ठाणे व वसाहतीच्या नूतन इमारत बांधकामाची चित्रफीत दाखविण्यात आली. कार्यक्रमाचे प्रास्ताविक सातारा जिल्हा पोलीस प्रमुख समीर शेख यांनी केले.