भक्तिरसाची उधळण करीत पहिला उभा रिंगण सोहळा संपन्न

एकता दर्शन, फलटण : संत ज्ञानेश्वर माऊलींच्या भक्तांची शिस्तबद्ध उभी रांग, माऊलींच्या अश्वाने घेतलेली दौड, दिंडीतील वारकऱ्यांच्या पायाने धरलेला ठेका, टाळ मृदूंगाच्या गजरात रंगलेल्या फुगड्या आणि हरिनामाचा गजर करीत विठ्ठलाला आळवीत अंत्यंत भारावलेल्या वातावरणात ज्ञानेश्वर माऊलींच्या पालखी सोहळ्यातील वारीच्या वाटेवरील पहिला उभा रिंगण सोहळा भक्तिरसाची उधळण करीत पार पडला.

संत ज्ञानेश्वर माऊलींच्या पालखी सोहळ्याचे दि.२० रोजी दुपारी फलटण तालुक्यात आगमन झाले. तालुक्याच्या सरहद्दीवर कापडगाव येथे तालुक्याच्या वतीने पालखी सोहळ्याचे स्वागत करण्यात आले. यावेळी आमदार दीपक चव्हाण, जिल्हा परिषदेचे माजी अध्यक्ष श्रीमंत संजीवराजे नाईक निंबाळकर, प्रांत अधिकारी सचिन ढोले, उपविभागीय पोलीस अधिकारी राहुल धस, पंचायत समितीचे गटविकास अधिकारी सतीश कुंभार, फलटण नगरपालिकेचे मुख्य कार्यकारी अधिकारी संजय गायकवाड, कोल्हापूर उपजिल्हाधिकारी मोहिनी चव्हाण, कापडगावच्या सरपंच कल्पना खताळ, उपसरपंच रामा केसकर यांच्यासह विविध शासकीय विभागाचे प्रमुख उपस्थित होते.

लोणंद येथील दोन दिवसांच्या मुक्कामानंतर पालखी सोहळ्याने फलटण तालुक्यात प्रवेश केला. साऱ्या विठ्ठलभक्त वारकऱ्यांना वेध लागले होते ते पहिल्या उभ्या रिंगणाचे. पालखी सोहळ्यातील पहिले उभे रिंगण असल्याने वारकऱ्यांची पाऊले तातडीने चांदोबाच्या लिंबाकडे पडत होती. सोहळा पुढे पुढे सरकत होता, रस्त्याच्या दुतर्फा असणाऱ्या स्थानिक माऊली भक्तांमधून आनंद व्यक्त केला जात होता. रस्त्याच्या बाजूला असणाऱ्या शेतामध्ये ठिकठिकाणी भारुडे रंगली होती. माऊली भक्त भारुड ऐकण्यात दंग झाल्याचे चित्र होते. भारुडात वैष्णव दंग झाला होता भारुडात रंगत येत होती. सोहळा पुढे सरकत चांदोबा लिंबाकडे आला. याठिकाणी तरडगाव पंचक्रोशीतील भाविकांनी पहिले उभे रिंगण पाहण्यासाठी मोठी गर्दी केली होती.

भाविकांची प्रचंड गर्दी असल्यामुळे रिंगण लावताना त्रास होत असला तरी पालखी सोहळ्यातील चोपदार यांनी चोप उंच आकाशाकडे धरताच सर्वत्र शांतता पसरली. कोणतीही सूचना न देता वारकऱ्यांच्या गर्दीतून लाखो वारकरी दुतर्फा झाल्याने अश्व धावत येण्यासाठी जागा मोकळी झाली. रिंगण लावल्यानंतर रथापुढील २७ दिंड्यांमधून माऊलींचा अश्व पुजाऱ्यांनी दौडत आणला. ज्ञानेश्वर माऊलींच्या पादुकांचे दर्शन घेऊन अश्व मागे १५ दिंड्यांपर्यंत नेहल्यानंतर माघारी पळत आला. माऊलींच्या रथाजवळ अश्व आल्यानंतर सोहळा प्रमुखांनी अश्वास पुष्पहार घालून खारीक खोबरे खाण्यासाठी दिले. यानंतर अश्वाने दौड घेतली. पुढे माऊलींचा अश्व व मागे स्वारीचा अश्व अशी दौड पूर्ण झाली. अश्वास प्रत्यक्ष माऊलींचा आशीर्वाद आहे या भावनेतून अश्व ज्या ठिकाणाहून गेला आहे त्या ठिकाणाची माती कपाळी लावण्यासाठी वारकऱ्यांची झुंबड उडाली होती. अशारितीने पालखी सोहळ्यातील पहिले उभे रिंगण भावमय वातावरणात पार पडले.

पहिल्या उभ्या रिंगण सोहळ्याने वैष्णव भक्तांमध्ये उत्साह संचारला होता. दिंड्यांमधून ठिकठिकाणी खेळ सुरु होते. दिंड्या पातकांचा गराड्यात फुगड्यांना उधाण आले होते. उभे रिंगण पार पडल्यानंतर पालखी सोहळा फलटण तालुक्यातील पहिल्या मुक्कामासाठी तरडगाव येथील पालखी तळावर विसावला. दरम्यान तरडगाव ग्रामपंचायतीच्या वतीने पालखी सोहळ्याचे गावाच्या वेशीवर स्वागत करण्यात आले. यावेळी आळंदी ते पंढरपूर या पालखी सोहळ्यातील अर्धा प्रवास पार केल्याचा आनंद वैष्णवांच्या चेहऱ्यावर दिसत होता.