दिशाहीन राजकारण जिल्ह्याला परवडणार नाही : आमदार रामराजे नाईक निंबाळकर

फलटण (एकता दर्शन) : माणचे आमदार आणि माढ्याचे खासदार यांना भाजपात ज्यांनी घेतलं आहे त्यांना आज ना उद्या पश्चाताप होणार आहे. हळूहळू सर्व बाहेर पडेल, वेळ लागतो परंतु आज ना उद्या फुगा हा फुटणार आहे. उपळवेचा आणि बोराटवाडीचाही फुगा फुटणार आहे. दिशाहीन राजकारण जिल्ह्याला व राज्याला परवडणार नसल्याची सल आमदार श्रीमंत रामराजे नाईक निंबाळकर यांनी बोलुन दाखवली.

येथील राष्ट्रवादी काँग्रेस पक्षाच्या "जनसंपर्क अभियान" कार्यक्रमात श्रीमंत रामराजे बोलत होते. यावेळी खासदार श्रीनिवास पाटील, माजी पालकमंत्री बाळासाहेब पाटील, आमदार शशिकांत शिंदे, आमदार दीपक चव्हाण, सुभाषराव शिंदे, श्रीमंत रघुनाथराजे, श्रीमंत संजीवराजे, श्रीमंत सुभद्राराजे, सुनील माने, तेजस शिंदे, विश्वजितराजे, महिला आघाडीच्या सौ. रेश्मा भोसले आदी मान्यवर उपस्थित होते.

कार्यकर्ते आमचं कुटुंब 

कार्यकर्ते आणि आमचं कुटुंब हे 'एक कुटुंब' समजून गेली कित्येक वर्षे आम्ही काम करत आहोत. आम्ही शून्यातून सुरुवात करून आज इथपर्यंत पोहोचलो आहोत. आम्ही आज सत्तेत नसलो, तरी राष्ट्रवादी काँग्रेस मध्ये असल्याचे सांगत पुर्वी चिमणरावांबरोबर सुभाषरावांचे संघर्ष झाले, माझे संघर्ष झाले, भोईटे साहेबांचे संघर्ष झाले, परंतु चिमणरावांनी कधीही बाहेरचा माणूस आणला नाही. आता उलट होत आहे आपले खासदार आपला स्वतःचा प्रचार करण्यासाठी जयकुमार गोरेंना इथे घेऊन येत आहेत मात्र यापुढे आमदार गोरेंना फलटणमध्ये येवु देणार नसल्याचा इशारा आमदार रामराजेंनी यावेळी दिला.

माझं त्यांना उघड आव्हान आहे 

उपस्थित कार्यकर्त्यांकडे बोट करून आमदार रामराजे म्हणाले, गेली ३० वर्षे आम्ही झक मारली. आमच्या कुटुंबाकडे बघितले नाही. पाणी आणले, कारखाना आणला, एमआयडीसी आणल्या. आम्हाला निधी नसला तरी आम्ही खाजगीत उभा करू आमच्यात धमक आहे. पण त्यांच्यात (विरोधक) धमक आहे का ? स्वतःला उद्योगपती समजता मग माझं त्यांना उघड आव्हान आहे कि कशाला तुम्ही रामराजे किती नालायक आहे म्हणून सांगता तुम्ही घ्याना तुमचं करून काय ते कॉरिडोर आहे ते. जा मोदीला सांगा. खासदारांनी उपळवेचा कारखाना हलवावा आणि म्हसवडला न्यावा बघू चालतोय का?

आगवण्याला मी फुस दिली ?

माढ्याचे खासदार माझ्यावर आरोप करतात कि मी आगवणेला फुस दिली, केसेस करायला लावल्या. आहो ह्या आगवण्याने माझ्यावर सुधा केसेस केल्या आहेत. माझ्यावर सर्व प्रकारच्या केसेस झाल्या आहेत. फक्त ३०२, ३०४, ३०६, ३७६ एवढ्याच राहिल्या आहेत. ॲट्रॉसिटीही झाली असल्याचे रामराजे यांनी यावेळी सांगितले.

गोरे-नाईक निंबाळकर यांचं वटसावित्रीचं नातं

भाजपच्या दोन मोकाट जनावरांच्या गुंडगिरीची भाषा यापुढे सहन करणार नाही. गुंडांना समजेल अशाच शब्दात उत्तर देण्याची आता वेळ आली असून यासाठी मला आपली साथ लागणार असल्याचे उपस्थितांना उद्देशुन रामराजे म्हणाले, खासदारांनी विकासासाठी ४६ हजार कोटी आणले म्हणे. आम्हाला तर तेवढे आकडेही लिहता येत नाहीत, त्यामुळे खासदार साहेब आपले ४६ हजार कोटी आपल्यालाच लखलाभ असो. ४६ हजार कोटींचा हा खर्च माणमधील बोराटवाडीत करून त्याचंच कल्याण करा. शेवटी तुमचं आणि त्यांचं नात वटसावित्रीचं नातं आहे, आणि ते न तुटावं असा प्रेमळ आशिर्वाद नाईक निंबाळकरांचा ज्येष्ठ माणुस म्हणुन मी देतो.

मी दोन शिफ्टमध्ये काम करतो 

वयाच्या ७५व्या वर्षी माझ्याकडे आणि संजीवराजेंकडे रोज शंभर माणसं भेटायला येतात व पंच्याहत्तरीतही मी दोन शिफ्ट मध्ये काम करतोय तरीही वेळ देता येत नाही एवढी माणसं आपल्याकडे आहेत. भाजपमध्ये जे खरे मुळ हिंदुत्त्ववादी नेते होते, ज्यांना हिंदुत्व पटत होते त्यांच्यापैकी एकही माणूस मला यांच्यासोबत दिसत नाही. संपूर्ण तालुक्यातले त्यांचे कार्यकर्ते जर बघितले तर शंभरच्यावर भरणार नाहीत. या दोघांनी हिंदुत्व हा शब्द मराठीत लिहुन दाखवावा. ह्या दोघांमुळे मला आता माझ्या पक्षापेक्षा जिल्ह्याच्या भारतीय जनता पार्टीची जास्त काळजी वाटत असल्याचे रामराजे यांनी आपल्या खास शैलीत सांगितले.

दरम्यान खासदार श्रीनिवास पाटील, बाळासाहेब पाटील, आमदार दीपक चव्हाण, आमदार शशिकांत शिंदे यांची भाषणे झाली. प्रारंभी उपस्थितांचे स्वागत ज्येष्ठ नेते सुभाषराव शिंदे यांनी केले. प्रास्ताविक श्रीमंत संजीवराजे यांनी केले. आभार बुरूंगले सर यांनी मानले. यावेळी जनसंपर्क अभियान कार्यक्रमास राष्ट्रवादी पक्षाचे पदाधिकारी, महिला, युवक, व कार्यकर्ते उपस्थित होते.